Rusia ka akuzuar sërish Shtetet e Bashkuara të Amerikës se kanë mbështetur një program për zhvillimin e armëve biologjike në Ukrainë. Sipas tyre, kjo përfshin patogjenë vdekjeprurës duke përfshirë murtajën dhe antraksin.
Sipas The Guardian, zëdhënësja e Ministrisë së Jashtme të Rusisë Maria Zakharova tha se provat e programit të supozuar ishin zbuluar nga Rusia gjatë “operacionit ushtarak” në Ukrainë.
“Tashmë mund të konkludojmë se në laboratorët biologjikë ukrainas në afërsi të drejtpërdrejtë me territorin e vendit tonë, po zhvilloheshin armë biologjike” – tha Zakharova.
Më tej, zëdhënësja e ministrisë thotë se Rusia ka dokumente të Ministrisë së Shëndetësisë së Ukrainës, ku kishte urdhëruar zhdukjen dhe shkatërrimin e provave të armëve biologjike pas 24 shkurtit, kur nisi dhe ofensiva ruse.
Zakharova tha se programi i supozuar ishte financuar nga Pentagoni dhe kërkoi transparencë nga Uashingtoni.
“Këtu nuk po flasim për përdorime paqësore apo qëllime shkencore… Çfarë keni bërë atje? Departamenti Amerikan i Mbrojtjes dhe administrata presidenciale e Shteteve të Bashkuara janë të detyruara t’i shpjegojnë zyrtarisht komunitetit global, zyrtarisht, jo përmes politikanëve që flasin, për programet në Ukrainë” – tha Zakharova.
Si Pentagoni ashtu edhe qeveria e Ukrainës i kanë mohuar me forcë këto akuza dhe Reuters raporton se nuk ishte e mundur të konfirmohej në mënyrë të pavarur vërtetësia e ndonjë dokumenti të tillë. Në përgjigje të pretendimeve të mëparshme ruse për programin e supozuar biologjik ushtarak në Ukrainë, një zëdhënës i Pentagonit tha të martën:
“Ky dezinformim absurd rus është pa dyshim i rremë”
Një zëdhënës i presidentit ukrainas tha se Ukraina “e mohon rreptësisht çdo pretendim të tillë”.
Pas komenteve të Zakharova më herët sot, zëdhënësi i Kremlinit Dmitry Peskov tha se Rusia i konsideron pretendimet e saj se Ukraina ka kryer programe biologjike ushtarake si një çështje të rëndësishme për të gjithë botën.
NDIQE LIVE "PANORAMA TV" © Panorama.al
