SPAK ka zgjeruar hetimet për Ceno Klosin edhe për abuzimet në punësimet në Administratën Tatimore. Javën e kaluar, SPAK i sekuestroi telefonin shefit të kabinetit të Ceno Klosit.
“Vetting” ka siguruar dokumente zyrtare të gjeneruara nga Drejtoria e Përgjithshme e Tatimeve, të cilat janë firmosur në shkelje të hapur të ligjit nga kreu i Tatimeve, Ceno Klosi. Këto dokumente lidhen me procedurat e lëvizjes së inspektorëve të Drejtorisë të Tatimpaguesve të Mëdhenj ose VIP e thënë ndryshe. Në listën e siguruar nga “Vetting” zbulohen emrat e 15 inspektorëve te Tatimet, të cilët me urdhër të Ceno Klosit, nr/ 152, datë 28 tetor 2022, të angazhohen në kryerjen e kontrolleve nga Drejtoria e VIPA-ve te Biznesi i Madh në Tiranë.
Ky veprim është në shkelje të pikës 2, të nenit 19, të Ligjit nr.9920, datë 19.5.2008, “Për Procedurat Tatimore të Republikës së Shqipërisë”, “Marrëdhëniet e punës së nëpunësve të administratës tatimore rregullohen sipas dispozitave të legjislacionit për nëpunësin civil, përveç rasteve kur në këtë ligj parashikohet ndryshe”. Por, shkeljet janë më të rënda kur në lojë është kupola e Tatimeve. Në rastin konkret, Oltion Caku, i cili fillimisht ka qenë drejtor te Tatimet në Fier, është ngritur në detyrë në shkelje të ligjit nga kreu i Tatimeve Klosi me urdhrin 20/1, datë 28 shkurt 2022.
VENDIMI PËR OLTION CAKU/”URDHËROJ:
1. Z.Oltion Caku, aktualisht në pozicionin Përgjegjës Sektori, në Sektorin e Kontrollit Tatimor, në Drejtorinë e Kontrollit Tatimor, në Drejtorinë e Përgjithshme të Tatimeve, caktohet të ushtrojë detyrat e funksionale të Drejtorit të Drejtorisë, në Drejtorinë e Kontrollit Tatimor, pranë Drejtorisë së Tatimpaguesve të Mëdhenj.”
Është ligji “Për Procedurat Tatimore”, i cili e thekson qartë nëpërmjet nenit 20, se: për këto punësime ka fuqi vepruese ligji nr. 152/2013 “Për Nëpunësin Civil”. Avokatja Margarita Kola shprehet se: “Kemi të bëjmë me një nivel përgjegjës sektori mesa kuptova, me një nivel të mesëm të nëpunësit civil, i cili ka kaluar me një transferim të drejtorit në nivelin e lartë TND që quhet, të nëpunësit civil. Ligji iç thashë në nenin 25, 26,27,28, tregon të gjitha hapat që duhen kryer. Edhe ajo që është më e rëndësishmja, në këtë rast duhet të kalosh patjetër nëpërmjet një konkursi kombëtar. Pra, jo nëpërmjet emërimit që ty ta bën titullari.”
Sipas neni 26, të Ligjit “Për Nëpunësin Civil”, plotësimi i vendeve të lira në kategorinë e ulët ose të mesme drejtuese bëhet, së pari, nëpërmjet procedurës së lëvizjes paralele dhe në rast të mosplotësimit të vendit të lirë, me procedurën e ngritjes në detyrë.
SHKELJE LIGJORE
Sipas avokates Margarita Kola, ngritjet në detyrë pa ndryshim page lënë shkak për dyshime. “Në këtë rast kanë ndodhur dy shkelje, e para ky nuk ka qenë njëherë në radhët e drejtuesve të lartë nëpunës civil dhe e dyta ka kaluar emërim jo nëpërmjet një konkursi kombëtar. Këto janë dy shkelje që janë në kundërshtim me nenin 25, 26, 27, 28 të Ligjit për Nëpunësin Civil”. Në ngritjen në detyrë të Oltion Cakut gjendet një paradoks në shkresën e firmosur nga kreu i Tatimeve, ku në pikën 2 shkruhet se “Marrëdhëniet financiare nuk ndryshojnë”.
Si është e mundur që një person ngrihet në detyrë pa iu ndryshuar rroga? Kush e paguan këtë person, Drejtoria e Kontrollit Tatimor apo Drejtoria e Tatimpaguesve të Mëdhenj? Një pyetje tjetër është: Pse shërben Departamenti i Administratës Publike kur kryetatimori Ceno Klosi emëron dhe i lëviz inspektorët në kundërshtim me ligjin e Nëpunësit Civil sipas dëshirave të tij? Avokati Redi Ramaj thotë se: “Vet ligji u krijua në vitin 2013, me idenë që të kishim një ndarje mes politikës dhe administratës publike”
EMËRIMET, SHKELJET E TJERA
Emërimi i Oltion Cakut në krye të drejtorisë së VIPA-ve është vetëm maja e ajsbergut, sepse në listën e personave të ngritur në detyrë pa garë gjenden Elidjana Celaj, Emilio Manoku, Altin Demiri, Sokol Muharremi, Vasilika Xhamo, Ram Papa dhe Sokol Çela. Këta punonjës Tatimorë gëzojnë statusin e Nëpunësit Civil, por Ceno Klosi i ka lëvizur në pozicione drejtuese në kundërshtim me ligjin e “Nëpunësit Civil”. “Ligji e përcakton edhe këtë, që edhe në qoftë se je drejtues përsëri i nivelit të lartë, mund të bëhet një lëvizje paralele.
Mund të mos ngrihesh në nivel më të lartë, të jesh po në të njëjtin nivel, në departament tjetër, dhe në këtë rast kërkohet konkurs kombëtar. Pra, ti duhet ti nënshtrohesh një konkursi, hapet vendi i punës, i nënshtrohesh konkursit, nqs., e fiton, do shkosh në pozicionin e punës”, – thekson avokatja Kola. Madje, ngritjet në detyrë të këtyre personave në shkelje të ligjit vendosin në pikëpyetje vendimet që këta të fundit nxjerrin, sepse mbasi kalojnë 6 muaj nuk kanë tagrin për të realizuar dhe firmosur shkresa të tilla. “Thelbi i kësaj është çfarë ndodh me vendimet që këta marrin? Sepse bëhet fjalë për ca titullarë të nivelit të lartë, të nëpunësit civil, pra, që do të thotë që kanë fuqi vendimmarrëse dhe vendimmarrja e tyre prodhon vendimmarrje tek personat ose për çështjet mbi të cilët këta marrin vendime. Nëse këtij i ka mbaruar afati i këtij emërimi, e para çdo vendimmarrje e tij është e pavlefshme, që do të thotë që nëse ti shkon dhe vendimmarrjen e tij e godet në gjykatë atëherë mundet të kërkosh shfuqizimin dhe pavlefshmërinë e aktit administrative, që ai ka nxjerrë e të tjera.
Pikërisht se ai nuk e ka pasur tagrin ta nxjerr, pra e nxjerrë mbi bazën e kësaj, pra, nuk ka pasur tagrin për ta marrë këtë vendimmarrje. Këtu jemi në rastin që nuk ka pasur tagrin e vendimmarrjes. Po gjithashtu edhe nëse emërimi i tij është bërë në kundërshtim me ligjin dhe çfarë do bëhet me vendimet e tij atëherë në këtë rast do të kërkohet pavlefshmëria e emërimit të personit në detyrë, pra, personi është emëruar në kundërshtim me ligjin. Pra, duhet konstatuar kjo pavlefshmëri dhe si rrjedhojë të kërkohet edhe pavlefshmëria e vendimmarrjes së tij. Ky është i vetmi ndryshim, por në të dyja rastet mendoj se vendimet janë të pavlefshme.”- tha për “Vetting” avokatja Margarita Kola. Është e qartë, që drejtori i Përgjithshëm Klosi ka tejkaluar kompetencat e veta, duke shumëfishuar numrin e shkeljeve ligjore dhe duke kontrolluar Administratën Tatimore përtej ligjit. Sipas nenit 109, pika a dhe ç, të ligji të Kodit të Procedurave Administrative, Ceno Klosi nuk mund të realizojë lëvizje të tilla, pasi në këtë rast janë jashtë kompetencave të tij si Drejtor i Përgjithshëm i Tatimeve.
SHKELJE, RAPORTON KLSH
“Nga auditimi i dokumentacionit u konstatua se janë kryer 31 emërime në Drejtorinë e Përgjithshme të Tatimeve dhe 26 emërime në Drejtorinë Rajonale të Tatimeve, me procedurën e përcaktuar në nenin 15 ‘Pranimi në punë pa konkurrim’, të kësaj rregulloreje”.
Pra, vet KLSH-ja konfirmon atë që ka ardhur në zyrat e “Vetting”, ku zbulohet se lëvizjet e emërimeve janë realizuar në shkelje të Kodit të Punës. “Gjatë vitit 2022, nuk është kryer asnjë emërim i punonjësve me kod pune, sipas përcaktimeve të nenit 9 “Procedura e përzgjedhjes së kandidatëve”, pika nr. 1, ku citohet se: Përzgjedhja e kandidatëve për punësim në ATQ kryhet si rregull nëpërmjet konkurrimit të hapur, bazuar në plotësimin e kërkesave nga kandidatët për punësim”, veprime në kundërshtim me ligjin nr. 7961, datë 12.07.1995 “Kodi i Punës i Republikës së Shqipërisë”, i ndryshuar, në nenin 9, pika nr. 5 dhe 6/a”.
Por Ceno Klosi nuk është i vetmi drejtues në konflikt interesi. “Vetting” ka zbuluar se njëri nga Inspektorët e Tatimeve VIP, Luftar Murrizi, është në konflikt të mundshëm interesi me detyrën, sepse rezulton aksioner në kompaninë “Grand Union”, ndërkohë që ka qenë Inspektor te Drejtoria e Tatimeve VIP dhe te Drejtoria Rajonale Tatimore. Sipas nenit 26, të ligjit “Për Procedurat Tatimore”, “Nëpunësit e administratës tatimore nuk mund të kontrollojnë apo vlerësojnë tatimet e veta apo të personave të lidhur me ta, me përjashtim të rasteve të vetëvlerësimit.” Por janë audituesit e KLSH-së që shkojnë më tej duke zbuluar se disa nga Inspektorët te Drejtoria Rajonale Tiranë nuk kanë dorëzuar akoma vërtetim gjykate, kopje të diplomës dhe listës së notave të noterizuar, CV, kopje të kartës së identitetit, raport mjeko-ligjor, librezë pune, si dhe autorizim për parandalimin e konfliktit të interesit.
Natyrisht mungesa e këtyre informacioneve që janë dokumente standarde për t’u punësuar fshehin probleme, të cilat tashmë kanë dalë në sipërfaqe. Avokati Redi Ramaj shton se: “Ndërhyrjet politike dhe mënyrës se si zhvillohet konkursi mënyra si afrohen punonjësit e ri, mënyra si afrohen ngritjet në strukturë, ngritjet në detyrë, lëvizjet paralele janë të orientuar gjithmonë politikisht”. Por, drejtori i Tatimeve nuk ka shkelur ligjin vetëm me emërimet, por edhe me rekrutimet. Administrata Tatimore është kthyer në një institucion publik, ku emërimet nuk bëhen në bazë të aftësive dhe kompetencave, por me urdhër të drejtorit të përgjithshëm pavarësisht ligjeve, të cilat bazohen te meritat profesionale.
Ky fakt konfirmohet nga Kontrolli i Lartë i Shtetit, i cili ka zbuluar një situatë problematike, e cila jo vetëm që krijon rreziqe për buxhetin e shtetit, por penalizon personat e kualifikuar ose specialistët, që prej kohësh po shterojnë në Administratën Publike. “Ligji e ka parasysh të shkojë ai i duhuri në vendin e punës. Kjo është ideja!”, – thekson avokatja Margarita Kola. Audituesit kanë zbuluar se, për të njëjtin pozicion pune, kërkesat e arsimit dhe përvojës në punë ishin të ndryshme.
Sipas KLSH-së, një inspektor ka si kriter pasjen e diplomës të nivelit “Master Shkencor”, si dhe me përvojë jo më pak se 2 vite në profesion, ndërsa një inspektor tjetër ka si kriter pasjen e diplomës “Master Profesional” dhe pa përvojë pune në profesion. Pra, gara për të fituar vendin e punës, tashmë nuk varet nga meritat profesionale, por nga politikat drejtuese të institucionit, të cilat në këtë rast shkelin ligjin e Kodit të Punës.
NDIQE LIVE "PANORAMA TV" © Panorama.al
