Nënkryetari i Partisë së Lirisë, Petrit Vasili ka denoncuar se janë grabitur zyrat e Partisë së Lirisë, ku persona të paidentifikuar kanë hyrë dhe kanë marrë rrjetin e komunikimeve elektronike.
Sipas Vasilit, kjo është një ngjarje e tipit mafioz, karakteristike e “rilindjes”, që sic tha ai kërkon të qeverisë përmes shantazhit dhe presionit.
“Partia e Lirisë është përballur me një ngjarje të tipit mafioz, karakteristike e “Rilindjes”, që kërkon të Qeverisë vetëm përmes shantazhit dhe presionit.
Në zyrat e saj kanë hyrë në mesnatë persona të paidentifikuar dhe të paautorizuar duke grabitur rrjetin e komunikimeve elektronike, një paisje DVR (hard disc) si dhe në mënyrë të fshehtë kanë kryer lidhje, dëmtime dhe këputje të linjave kabllore.
Partia e Lirisë në respekt të ligjit ka depozituar denoncimin e kësaj ngjarjeje në Prokurorinë e Tiranës për hetimin dhe identifikimin e autorëve.
As kjo tentativë dhe asnjë presion nuk e ul dot ritmin dhe vendosmërinë e Partisë së Lirisë për t’u përballur me “Rilindjen” dhe mashat e saj, por përkundrazi shumëfishon energjitë e saj në betejën për përmbysjen e narkoqeverisjes rilindase”, thuhet ne denoncimin e Vasilit.
NDIQE LIVE "PANORAMA TV" © Panorama.al
