Nje dite me pare, pas publikimit të një videoje prej rreth 8 minutash, deputeti Tom Doshi ka publikuar edhe disa foto të personave që dyshohen se kanë pasur dijeni për autorët e atentatit kriminal ndaj tij dhe deputetit Mhill Fufi.
Në foto shfaqet drejtuesi i Prokurorisë së Krimeve të Rënda Eugen Beci (personi me syze), si dhe një tjetër shtetas që qëndron përballë tij dhe që medohet të jetë personi i aluduar nga shkëmbimet e akuzave ditët e fundit mes deputetit Doshi dhe ministrit të Brendshëm, Saimir Tahiri, si ndërmjetësi i porositësit të atentatit kriminal.
Në një koment të shkurtër që shoqëron fotot e publikuara në rrjetin social “Facebook”, Tom Doshi shkruan se: Ky është organi i akuzës në Shqipëri!
Përfshirja e prokurorit për Krimet e Rënda në këtë ngjarje u përmend paraditen e sotme nga ministri i Brendshëm, Saimir Tahiri, i cili duke iu referuar deklaratave që sipas tij Tom Doshi i kishte thënë disa muaj më parë, prokurori kishte qenë pjesë e skenarit bashkë me disa persona të tjerë.
Ndërkaq, në foton e publikuar nga Doshi, thuhet se është edhe Fatjon Skënderi, ish-shoferi i Partisë Republikane. Për këtë të fundit ministri i Brendshëm, duke iu referuar thënieve rrëfimeve të deputetit të Shkodrës disa muaj më parë, Fatjon Skënderi, ka qenë në dijeni të komplotit.
Lidhur me aludimet e ministrit Tahiri, ditën e mërkurë reagoi edhe kryetari i Partisë Republikane Fatmir Mediu, i cili tha se Fatjon Skënderi ka qenë pjesë e PR-së nga viti ’91 deri në ’93 dhe që prej asaj periudhe, nuk është pjesë e strukturave të kësaj partie. Gjithashtu Mediu përgënjeshtroi akuzat e ngritura nga ministri i Brendshëm.
Fotot e deputetit Doshi vijnë pak kohë pasi ai publikoi një video në profilin e tij në “Facebook”, ku shfaqet personi i arrestuar një ditë më parë nga policia e Shtetit, Durim Bami, duke folur për komplotin e organizuar ndaj tij.
