Kim Kardashian ndau një imazh të ri në Instagram, ku tregon gjerdanin me diamante verbuese, të bërë me porosi.
Thuhet se gjerdani i saj arrin vlerën 150 mijë dollarë, aq sa ç’është vlera e një shtëpie luksoze, raporton “US Weekly”.
Më parë është thënë se Kim ishte zotuar të mos postonte bizhuteritë e saj në mediat sociale, pasi u bë shënjestër e grabitësve në Paris në 2016-ën.
Kim u kërcënua me armë në dhomën e saj të hotelit gjatë një grabitjeje, ku pa hajdutët duke i vjedhur xhevahire me vlerë 10.5 milionë dollarë.
Pak ditë më parë ajo u cilësua nga “Forbes” zyrtarisht si miliardere. Media e njohur ka raportuar se tashmë pasuria e Kim ka arritur në 1 miliardë dollarë pas suksesit me “KKW Beauty” dhe “Skims”.
Sipas “Forbes”, Kim ka fitime edhe nga “Keeping Up With The kardashians”, kontrata dhe investime të tjera. Pasuria e saj u shtua pasi ajo shiti 20% të aksioneve të “KKW Beauty” për 200 milionë dollarë në 2020.
Kim nisi biznesin me “KKW Beauty” më 2017 pasi pa suksesin e kompanisë kozmetike të motrës Kylie Jenner, “Kylie Cosmetics”. Ajo krijoi kompaninë e veshjeve “Skims” më 2019 dhe vazhdoi me linjat e reja edhe gjatë pandemisë.
