PRISHTINE-
Presidenti i Republikës, Bujar Nishani ka vijuar sot me agjendën zyrtare, me takime të veçanta me Zëvendëskryetarin e AAK-së, Blerim Shala, drejtuesin e Lëvizjes “Vetëvendosje”, Albin Kurti si dhe me një delegacion i zgjeruar shqiptarësh nga Lugina e Preshevës.
Gjatë takimit me kreun e VV-së, Albin Kurti, Nishani tha se, duke patur parasysh faktorizimin e kombit shqiptar në rajon dhe më gjerë, roli i Lëvizjes “Vetëvendosje” është i vlerësueshëm’’
Më tej Presidenti i Shqipërisë vuri theksin tek bashkëpunimi mes partive politike, me qëllim ofrimin e një vizioni sa më transparent e largpamës, si një domosdoshmëri dhe kërkesë e këtij realiteti të ri të pamohueshëm, në mënyrë që t’u shërbehet interesave të qytetarëve të Kosovës si dhe interesave madhore të kombit.
Ndërkaq, gjatë takimit me Zëvendëskryetarin e AAK-së, Blerim Shala, Nishani vlerësoi kontributin e Aleancës për Ardhmërinë e Kosovës në skenën politike, pa harruar të vërë në dukje rolin dhe sakrificat sublime të udhëheqësve të saj gjatë luftës për liri dhe pavarësi.
Në takimin me përfaqësinë nga Lugina e Preshevës, Nishani pasi dëgjoi kërkesat e tyre, theksoi se nga informacionet që ka nga Ministria e Arsimit, çështja e njohjes së diplomave po shkon drejt zgjidhjes.
Nishani apeloi që të mos hiqet kurrë dorë nga arsimi i brezit të ri në gjuhën shqipe, ndërsa siguroi përfaqësuesit se, institucionet shqiptare e kanë obligim për të parë mundësitë në mbrojtje të të drejtave të shqiptarëve të Luginës së Preshevës
Perfaqesuesit e Lugines kërkuan një bashkëpunim dhe përkrahje më të madhe për zgjidhjen e problemeve të tyre nga shteti shqiptar si: qarkullimi i lirë i qytetarëve, mungesa e prespektivës për punësimin, njohja e diplomave, diskriminimi dhe shpërngulja e shqiptarëve të Luginës së Preshevës.
NDIQE LIVE "PANORAMA TV" © Panorama.al