Ditën e nesërme opozita maqedonase me në krye Zaevin do të publikojë dokumente të rëndësishme lidhur me rastin “Monstra”, ku janë dënuar me burgim të përjetshëm gjashtë shqiptarë të Maqedonisë.
Sipas gazetarit investigativ, Sasho Denesoskit, i cili shkruan për “Ohridsku”, materialet që disponon Zaevi do të mjaftojnë për ta fundosur përgjithmonë VMRO-në.
Denesosku shkruan se fëmijët janë vrarë shumë larg liqenit të Smillkovës, ku u gjetën trupat, dhe se vrasja e pesëfishtë është bërë nga njësitë speciale “Alfa”.
Këto të fundit, i kanë çuar trupat e pajetë të fëmijëve te liqeni i Smillkovës. Ai gjithashtu tregon se dokumentet do të hedhin dritë edhe mbi vrasjen e rojës së liqenit.
“Pas kësaj “bombe” do të bëhet më se e qartë se kush e dha urdhrin për vrasjet, ku janë vrarë fëmijët, si është vrarë roja te liqeni i Smillkovës, si edhe informata rreth veturës së famshme të gjetur jo larg nga vendi i krimit, të cilën sipas informatave më parë e kanë përdorur njësitë speciale “Alfa” dhe të tjerë”, shkruan Sasho Denesovski.
NDIQE LIVE "PANORAMA TV" © Panorama.al
