Analisti Fatos Lubonja shkruan në një koment për gazetën “Panorama” se lufta brenda Partisë Socialiste mes kryeministrit Edi Rama dhe deputetit Tom Doshi bëhet vetëm për pushtet.
Sipas tij “Sigurisht duke u bazuar në përvojën që kemi dhe njohjen e këtyre lojtarëve, e kemi të vështirë të besojmë se ndeshjet e tyre janë për hir të punëve tona. Mua më duket se ky ekuacion i ri është ndërtuar për shkak se ekuilibrat e pushtetit të PS të ngritura një vit e gjysmë më parë, për sa i përket rëndësisë dhe pushteti që kishin disa protagonist atëherë dhe të rëndësisë e pushtetit që kanë ata sot, kanë ndryshuar. Pra, kemi të bëjmë me vazhdimin e lojës për pushtet në një kontekst të ri, edhe më të ndërlikuar, ku hallet e vendit shërbejnë vetëm si një pretekst për luftë”.
“Lojtari i parë në këtë luftë është Edi Rama, i cili një vit e gjysmë pasi ka marrë pushtetin, ka vendosur të bëjë një hap të ri përpara në konsolidimin e pushtetit të tij. Ndryshe nga Sali Berisha që pushtetin e tij absolut mbi PD e ka marrë që në krye të herës kur është krijuar partia, Rama ka ende disa problem me faktin se pushtetin e ka marrë duke u anëtarësuar vonë në PS. Pra Edi Ramës, për të ecur në rrugën e tij drejt konsolidimit të pushtetit në PS, i duhet të heqë qafe disa mbeturina kokëforta të Partisë Socialiste. Dhe për mendimin tim këtë punë thuajse e ka mbaruar. Ben Blushi mund të jetë symbol i atyre që kanë mbetur. Të tjerë kanë kaluar në hije dhe e kanë pranuar rolin e tyre në hije”, shkruan më tej Lubonja.
NDIQE LIVE "PANORAMA TV" © Panorama.al
