Mbledhja e Këshillit Politik ka përfunduar pas 4 orësh diskutime mes përfaqësuesve politikë në tryezë për Reformën Zgjedhore.
Përfaqësuesi i PD, Oerd Bylykbashi tha se “jemi të gatshëm të qëndrojmë më orë të tëra për kompromis”, ndërsa tregoi se “nuk patëm dakordsi me çështjen e policisë”.
“Nesër në orën 11:00 presim që mazhoranca të vij me një propozim. Mazhoranca s’është e gatshme të fus identifikimin biometrik. Duhet që identifikimi biometrik të futet në qendrat e votimit”, tha Bylykbashi.
“U hap debat në lidhje me votimin elektronik dhe identifikimin biometrik. Për fat të keq për ne doli qartë qëndrimi i mazhorancës që nuk është e gatshme të ecë në këtë drejtim, të fusë identifikimin biometrik në të gjitha qendrat e votimit për të garantuar që kutitë e votimit nuk mbushen, nuk do që të mos ketë votim në emër të emigrantëve që nuk kanë ardhur kurrë në Shqipëri, të mos ketë votim familjar, që komisionerët të mos mbushin kutitë në mbylljen e procesit të votimit për ata që nuk erdhën të votonin dhe të mos votohet me karta identiteti të falsifikuara. PS e bëri të qartë që nuk ishe e gatshme për këtë. Kjo është një nga temat kryesore të opozitës prej vitesh për garantimin e kutisë, që kur të numërohet të numërohen votat e vërteta të zgjedhësve dhe jo të falsifikuara. Pa arritur kompromis për këtë çështje është e vështirë të arrihet kompromis për çështje të tjera si administrata zgjedhore, administrimi i zgjedhjeve nxjerr rezultatin. Presim që mbledhjen e nesërme në orën 11:00, mazhoranca të vijë me një propozim ku të jetë e qartë: Identifikimi biometrik duhet të jetë në të gjitha qendrat e votimit në zgjedhjet e ardhshme, të ketë një pilot për votimin elektronik dhe kjo të dalë e qartë jo si opsion i mundshëm për KQZ por një detyrim për të dhe qeverinë. Qeveria të vendosë paratë në mënyrë që shqiptarëve të mos u manipulohen zgjedhjet”, tha Bylykbashi.
NDIQE LIVE "PANORAMA TV" © Panorama.al
