Kreu i BD, Astrit Patozi tha se Shqipëria ka nevojë “ulëritëse” për të prekur Kushtetutën, por jo duke kufizuar Presidentin e Republikës.
Me një shënim në facebook, Patozi shkruan se duhet t’i zvogëlohen kompetencat kryeministrit dhe t’i hollohet pushteti, si e vetmja rrugë, sipas tij, për të shpëtuar shoqërinë nga “humori dhe shijet banale të udhëheqësve”.
Patozi shton më tej se prej një muaji, partia e tij ka shpallur një platformë serioze për reformimin e plotë të sistemit tonë politik, në epiqendër të së cilës është kufizimi drastik i pushtetit të kryeministrit.
Postimi i plotë:
PËR ATA QË E DUAN EDI RAMËN TË DOBËT, JO VETËM NË STADIUM
Në këtë vend nuk mund të thuash asnjëherë që e keqja ka prekur fundin, ndaj edhe asgjë nuk mund të parashikohet me siguri. Me sa duket, dikujt i ka ka lindur në kokë marrëzia e radhës për të shpëtuar prej Ilir Metës, duke ndryshuar kushtetutën.
Në fakt, Shqipëria ka realisht një nevojë ulëritëse për ta prekur kushtetutën, por jo duke kufizuar Presidentin e Republikës. Sepse ne hallin më të madh e kemi me kryeministrin, të cilit duhet t’ia hollojmë sa të mundemi pushtetin dhe t’ia zvogëlojmë kompentencat.
Është e vëtmja mënyrë për të reduktuar dëmin që mund të sjellë ai, fillimisht duke deformuar zgjedhjet, e më pas duke sunduar me arrogancë, në vend që të qeverisë normalisht.
Por çudia qëndron se ata, që ngazëllehen me të drejtë në stadium nga thirrjet “Rama ik”, nuk thonë asnjë fjalë për këtë çështje. Ndërkohë BINDJA DEMOKRATIKE ka shpallur prej gati një muaji një platformë serioze për reformimin e plotë të sistemit tonë politik, në epiqendër të së cilës është kufizimi drastik i pushtetit të kryeministrit.
Sipas nesh, kjo është e vetmja rrugë për të shpëtuar shoqërinë nga humori dhe shijet banale të udhëheqësve, që shndërrohen gradualisht në përbindësha politikë, duke keqpërdorur privilegjet që i garanton sistemi ynë i dështuar.
NDIQE LIVE "PANORAMA TV" © Panorama.al
