Pak kohë më parë, një shkrim në mediat britanike për Javier Bardem hapej me titullin “Nuk di të nis as një e-mail”. Aktori spanjoll me siguri që nuk sheh asnjë nga komentet që i bëjnë në rrjetet e komunikimit apo në gazetat online, sepse me kompjuterin nuk ka asnjë marrëdhënie. Disa prej nesh, të përfshirë në rutinën e zhurmshme, ku teknologjia është në krye të listës së ekzistencës, e panë lajmin me zili. A mund të dalësh nga e gjithë kjo e të rinisësh “një jetë të re”!? Të heqësh kufjet, të mbash sytë drejt jo vetëm poshtë, ta prekësh librin, t’i çlirosh shqisat nga pritja që sinjali të mbërrijë… Përderisa këta njerëz që ende e shijojnë këtë liri janë aq të paktë sa përbëjnë lajm, me siguri që jo. Ama ka edhe raste të tjera kur të gjitha mënyrat e komunikimit në distancë janë të domosdoshme. Në familje, për fëmijët apo ndonjërin prej pjesëtarëve që jeton jashtë shtëpisë, skype shoqëron të gjitha vaktet. Kjo, në variantin më të mirë, sepse mund të shoqërojë edhe të gjitha frymëmarrjet.
Frymëzuar nga ky fenomen pushtues, hapëm këtë rubrikë që po e nisim me Anila Gjebrean. Jo pa shkak. Djali i saj dhe i Arditit, Joni, prej më shumë se tri vitesh tashmë jeton e studion në Vjenë. Ai vetë, gjatë ditës është në shkollë, prindërit nëpër angazhimet e tyre, kështu që nuk bën asnjëri e as tjetri pjesë në grupin e njerëzve të varur nga drita e telefonit apo e laptop-it. Kanë kohën e tyre. Mbrëmja, duke qenë më e lirë për të gjitha palët, ndez ekranin e skype-t, duke krijuar atmosferën e një salloni të përbashkët, ku janë të gjithë si dikur.
“Joni nuk ka shumë kohë të lirë, sikundër edhe ne, por flasim çdo mbrëmje në skype. Përveç tij, sot programet e telefonave që shtohen dita-ditës, të bëjnë të jesh në lidhje të vazhdueshme me të afërmit përmes mesazheve. Në rastin tonë, Joni është në krye të listës”. Por mesazhet nuk të mbushin gjithnjë, të paktën jo kur e di se me lëvizjen e gishtit mund t’i kesh të dashurit përpara syve. Sidomos kur ke një bukuroshe të vogël për motër që të shkëmbejë mesazhe nuk mundet. Di vetëm të të ndriçojë ditën me një buzëqeshje të madhe, më mirë se çdokush tjetër mund ta bëjë. Për këtë, sa kohë je larg, skype është i pazëvendësueshëm. Për Jonin, për Anën, e patjetër për prindërit që për të qeshurat e tyre jetojnë.
ANI JAUPAJ
NDIQE LIVE "PANORAMA TV" © Panorama.al
