Kryetari i Frymës së Re Demokratike, Bamir Topi, shprehet se Andi Seferi është nënkryetar i Bashkisë së Tiranës dhe ka nisur punën që dy ditë më parë. I pyetur nga gazeta “Panorama” në lidhje me zbatimin e marrëveshjes me Partinë Socialiste për zgjedhjet vendore të 21 qershorit, kreu i FRD-së shprehet se grupi negociator po punon për zbatimin e saj dhe gjithçka po ecën hap pas hapi.
“Nënkryetari është anuncuar, Andi Seferi ka qenë në punë dhe ka pasur arsye njerëzore që nuk ka qenë prezent një ditë më parë. Zbatimi i marrëveshjes do të përfshijë përfaqësimin tonë në këshillin e qarkut, në nënkryetarët e Bashkisë, nga drejtoritë dhe në administratë në proporcion me rezultatin tonë”, tha Topi.
Sipas tij, marrëveshja me Partinë Socialiste për të qenë pjesë e qeverisjes vendore, shtrihet në të gjithë territorin e kësaj bashkie.
“Ka një grup negociator që po merret me implementimin e marrëveshjes. Gjithçka po ecën normalisht. Është një situatë që po ecën hap pas hapi dhe që kërkon kohën e saj për t’u zbatuar. Marrëveshja në Bashkinë e Tiranës shtrihet për të gjithë territorin ku ne kemi konkurruar”, u shpreh për gazetën “Panorama” kreu i FRD-së.
Fryma e Re Demokratike ka marrë një nga katër nënkryetarët e Bashkisë së Tiranës dhe pritet që ajo të përfaqësohet edhe në rang drejtorësh në këtë bashki. Dy ditë më parë, kryetari i ri i Bashkisë së Tiranës, Erion Veliaj, prezantoi 24 administratorët e kësaj bashkie, të cilët do të drejtojnë minibashkitë dhe komunat e mëparshme që i janë bashkuar bashkisë së madhe.
Përmes një statusi të postuar në “Facebook”, Veliaj u kërkoi qytetarëve që të vizitojnë njësinë e tyre administrative për t’u njohur me administratorët e rinj që do të jenë në shërbim të qytetarëve çdo ditë të javës.
“Nga dje, 24 administratorë në punë 24/7 në çdo njësi të Tiranës. Vizito njësinë tënde për t’u njohur me administratorin e ri dhe na informo për shërbimet aty. Botën s’e ndryshojnë tallësit, por menaxherët! #Ndryshim# BesoDheKontrollo”, shkruan Veliaj. Ditën e prezantimit të tyre, të cilëve u ka dorëzuar vulat e kompetencave të tyre në zonat e tyre administrative, Veliaj ka deklaruar dje se “administratorët e rinj duhet që të garantojnë shërbime për qytetarët që ditën e parë të marrjes së detyrës, ndërkohë që porosia për ta ka qenë performanca dhe rezultatet”.
ARISTIR LUMEZI
NDIQE LIVE "PANORAMA TV" © Panorama.al