DORINA AZO/ Nga skema e sigurimit të depozitave, deri në fund të dhjetorit 2017, individët kanë përfituar 624 miliardë lekë, duke përbërë 67 për qind të vlerës së depozitave të sigurueshme.
Depozitat e siguruara janë rritur 12,6 miliardë lekë krahasuar me 2016-ën. Numri i qytetarëve që kanë depozita deri në 2,5 milionë lekë përfaqësojnë rreth 96.3 për qind të depozituesve, që përfituan nga skema.
Ndërsa 3,7 për qind të depozituesve zotërojnë depozita më të mëdha se 2,5 milionë lekë. Këto depozita në vlerën e 531 miliardë lekëve u përkasin 92,818 depozituesve. Të dhënat jepen në raportin vjetor për 2017-ën të Agjencisë së Sigurimit të Depozitave.
“Depozitat e siguruara të individëve për sistemin bankar në fund të dhjetorit 2017-të ishin në vlerën 624 miliardë lekë dhe përbëjnë 67 për qind të vlerës së depozitave të sigurueshme të individëve. Depozitat e siguruara të individëve në sistemin bankar në fund të vitit 2017-të u rritën me 12.6 miliardë lekë ose 2.1 për qind krahasuar me një vit më parë”, thuhet në raport.
Në rritjen vjetore të depozitave të sigurueshme të individëve, ndikim më të madh kanë pasur depozitat në monedhë të huaj, të cilat janë rritur më shpejt se depozitat në lekë. Depozitat në monedhë të huaj për 2017-ën u rritën 2 për qind, kundrejt depozitave në lekë që pësuan rritje 0,2 për qind. Ndërsa në total, për 2017-ën vlera e depozitave të sigurueshme që përfitojnë nga skema e sigurimit të depozitave arriti 1,074 miliardë lekë, duke përfaqësuar 96.3 për qind të totalit të depozitave.
“Si rezultat i këtij zgjerimi, rritja vjetore e depozitave të sigurueshme në vlerë ishte 161 miliardë lekë ose 17.6% më shumë krahasuar me vlerën prej 913 miliardësh lekë të depozitave të sigurueshme të individëve, që ishte në fund të vitit të kaluar”, citohet në raport. Në raport thuhet se të ardhurat nga primet e sigurimit për vitin 2017-të ishin 3.2 miliard lekë apo 7.17% më të larta se në vitin 2016-të.
Agjencia e Sigurimit të Depozitave shprehet në raport se të ardhurat nga primet e sigurimit përgjatë periudhës 2009 – 2017 kanë qenë në rritje, gjë që lidhet drejtpërsëdrejti me rritjen e depozitave të siguruara në sistemin bankar në këto vite. Raporti i mbulimit mbi 5% të depozitave të siguruara u arrit për herë të dytë edhe në 2017-ën që nga krijimi i Agjencisë së Sigurimit të Depozitave.
Realizimi i këtij objektivi, si një tregues i përfshirë në ligjin për sigurimin e depozitave, është i rëndësishëm sepse dëshmon për efikasitetin e skemës për t’iu përgjigjur detyrimeve ndaj depozituesve, si dhe ecurinë pozitive të fondit të sigurimit të depozitave në banka ndër vite.
PANORAMA
NDIQE LIVE "PANORAMA TV" © Panorama.al
