Anjeza (Husha) Shabani, administratorja e kopshtit privat “Diren”, e shfaqur në videon ku dhunonte brutalisht një fëmijë 3-vjeçar, do të hetohet në masën e sigurisë “arrest në burg”. Gjykata e Tiranës pranoi dje kërkesën e Prokurorisë për caktimin e kësaj mase sigurie për 32-vjeçaren e akuzuar për “keqtrajtim të mituri” dhe “shpërdorim të detyrës”.
Gjatë seancës së zhvilluar me dyer të mbyllura, administratorja ka mbajtur qëndrim pendues, duke pohuar se gjithçka kishte qenë vetëm një moment tensioni dhe se rasti i filmuar ishte i vetmi.
Pendesa e saj, si edhe pretendimet për një masë më të butë sigurie për shkak të mungesës së rrezikshmërisë shoqërore dhe faktit se është nënë e një fëmije të mitur, nuk e bindën Gjykatën. E dyshuara erdhi e qetë në Gjykatë, por nuk i mbajti lotët kur Gjykata shpalli vendimin që e la në qeli.
BISEDA ME BABAIN
Në daljen e saj të parë në publik, pas transmetimit të video-skandalit në programin investigativ “Stop” në TV Klan, Anjeza Shabani pati një komunikim të shkurtër në distancë me të atin.
Biseda ndodhi në momentin kur ajo zbriti nga automjeti i Policisë për t’u futur në derën e Gjykatës. “Babi, jam mirë”, thirri ajo me zë të lartë, drejtuar të atit, i cili kishte hipur në kangjellat e portës së Gjykatës. “Bravo, bravo bab, e fortë të bëhesh”, iu përgjigj po me volum i ati. Pak minuta më vonë, Anjeza Shabani u shfaq një kafazin e sallës nr.1 të Gjykatës së Tiranës.
SEANCA
Ora shënonte 11:31 kur Anjeza Shabani u shfaq në sallën e gjyqit, të tejmbushur me gazetarë dhe dhjetëra kamera televizive. Ajo u ul në karriget e kafazit të hekurt me pranga në duar, të cilat iu hoqën kur në sallë u fut gjyqtarja.
Në vijim, me urdhër të kryesueses, salla u boshatis nga gazetarët, për t’u zhvilluar me dyer të mbyllura. Burime brenda sallës bënë me dije se përfaqësuesi i Prokurorisë ka paraqitur si provë deklarimet e prindërve të të miturit të dhunuar, si edhe procesverbalet mbi sekuestrimin e pamjeve të plota filmike të video-skandalit dhe të këqyrjes së tyre. Përfaqësuesi i Prokurorisë, Genci Qano, ka pretenduar se në rastin e të dyshuarës Shahini ekzistojnë kushte ligjore për caktimin e masës “arrest në burg” ndaj saj.
I kundërt me këtë pretendim ka qenë ai i të dyshuarës, si edhe i avokatit të saj mbrojtës. “Ka qenë vetëm një moment tensioni. E qëllova pasi ai po shqetësonte fëmijët e tjerë me të qarën pa pushim. Nuk ka ndodhur asnjëherë tjetër. Unë e kam puthur pasi ndodhi kjo. Më lejoni të kthehem në shtëpi, pasi jam nënë vetë”, mësohet të jetë shprehur e dyshuara para Gjykatës. Nga ana e tij, mbrojtësi ligjor i saj i kërkoi Gjykatës masë më të butë se ajo e kërkuar nga prokurori. ARMAND BAJRAMI
AKUZAT
Menjëherë pas inspektimit të bërë, tashmë Hetimi Tatimor është vënë në lëvizje duke bllokuar kopshtin “Diren”.
Në një intervistë për mikrofonin e “STOP”, Zëdhënësi i Përgjithshëm i Drejtorisë së Tatimeve, Erjon Prifti, pranoi se ky subjekt është i pa licensuar. Ai gjithashtu shtoi se do të kryhet një investigim fiskal (tatimor), si dhe do të hetohen dhe do të penalizohen të gjithë personat përgjegjës.
NDIQE LIVE "PANORAMA TV" © Panorama.al
