Ambasadorja amerikane Yuri Kim ka reaguar sot pasi Komisioneri Publik apeloi vendimin e Komisionit të Pavarur të Kualifikimit, lidhur me drejtuesen e Prokurorisë së Tiranës, Elisabeta Imeraj, për të cilën u arsyetua se nuk ka asnjë provë apo indicie për përgjime për vëzhguesin ndërkombëtar.
Por ambasadorja amerikane thotë se tani do të shihet me kujdes se çfarë do të ndodhë me këtë çështje, pas apelimit.
Diplomatja amerikane ngre pyetjen, nëse përgjigja ndaj apelimit të bërë do të jetë në favor të dhënies drejtësi, apo do të jetë një përpjekje për të sulmuar procesin e vetingut.
Sjellim në vëmendje se Komisioni i Pavarur i Kualifikimit, pas një hetimi administrativ për kryeprokuroren e Tiranës, Elisabeta Imeraj, e cila e ka kaluar me sukses procesin e vettingut tha se nuk rezultoi të administrohet asnjë fotografi, apo përgjim për ish vëzhguesin Kijlstra.
“As rezulton që subjekti i rivlerësimit (Elisabeta Imeraj) të ketë njohuri në lidhje me to. Pretendimet e bazuara në letrën e Rrahim Shehut, mbeten pretendime të shprehura nga ky i fundit pa asnjë të dhëne tjetër me vlerë provuese.
Nga ana tjetër, bazuar në dokumentacionin e administruar, nuk rezulton që z. Kijlistra ta ketë adresuar shqetësimin e tij gjatë qëndrimit në Shqipëri në asnjë nga agjencitë kompetente për ndjekjen e rastit, si në polici apo prokurori, fakt ky i konfirmuar nga përgjigjet zyrtare. Në këtë mënyrë, akuzat e ngritura në seance dëgjimore nuk qëndrojnë” – thuhej në vendimin për Elisabeta Imerajn.
REAGIMI I PLOTE I YURI KIM
Në përputhje me rolin e tij kushtetues në procesin e verifikimit, vëzhguesit nderkombetare dje u rekomanduan Komisionerëve Publikë që të apelojnë vendimin e Komisionit të Pavarur të Kualifikimit për një çështje të rëndësishme.
Të gjithë duhet të shikojmë nga afër se çfarë do ndodhë më pas.
A do të jetë përgjigjje për të treguar guxim dhe integritet ne favor të dhënies drejtësi apo, siç e kemi parë shumë shpesh në të kaluarën, për të devijuar drejtësinë duke sulmuar procesin e vetingut dhe duke shpifur mbi vëzhguesit ndërkombëtarë?
A do t’i shërbejë media publikut dhe a do ta mbulojnë këtë çështje me integritet, apo do të marrin telefonata dhe do të pranojnë të qëndrojnë të heshtur dhe të verbër?
Është koha të tregojmë guxim dhe integritet.
Koha për të thyer modelet e vjetra që dëmtojnë Shqipërinë. Koha për të ecur përpara, hap pas hapi. SHBA do te jenë me ju.
SHKRESA E ONM
Operacioni Ndërkombëtar i Monitorimit (ONM), i rekomandoi dje Komisionerit Publik të ankimojë vendimin e Komisionit të Pavarur të Kualifikimit (KPK) për konfirmimin në detyrë të prokurores Elizabeta Imeraj, e cila drejton aktualisht Prokurorinë e Tiranës.
Në një shkresë e plotë, ONM-ja, i parashtron Komisionerit Publik të gjitha gjetjet mbi Elizabeta Imerajn, që sipas institucionit në fjalë vënë në rrezik besimin e publikut te drejtësia. Mes çështjeve të përmendura në shkresë një vend të bollshëm zë divorci i prokurores me bashkëshortin, i cili konsiderohet nga ONM si fiktiv.
“Është e qartë si kristali për ata pranë Elizabeta Imerajt, dhe cilindo që ka pasur mundësinë për ta takuar, qoftë edhe për një moment, se ajo ka kryer një divorc fiktiv me të bashkëshortin, për ta përdorur me qëllim tejkalimin e problemit përpara Komisionit të Pavarur të Kualifikimit (KPK). Ajo u divorcua nga bashkëshorti i saj **** kur kuptoi që as ndërhyrjet nuk po funksionin”, thuhet në konkluzione.
ONM vë gjithashtu në dukje kohëzgjatjen e procedurës së divorcit, duke u shprehur se ka evidenca që procesi u përshpejtua për arsye të jashtme.
“Vendimi mbi divorcin u mor në dhjetor të 2019-ës, që tregon se procedura ishte tejet e shkurtër dhe mund të shihet si evidencë se u përshpejtua për arsye të jashtme dhe jo për faktin se çifti nuk mund të jetonte më me njëri-tjetrin. Në gusht të 2020-ës ONM-ja i kërkoi Gjykatës së rrethit të Tiranës një listë të procedurave të divorcit që ishin mbyllur brenda 2019-ës, me të dhëna të datave të nisjes dhe procedurat përkatëse. Lista iu dërgua ONM-së në shtator 2020. ONM krahasoi kohëzgjatjen e të gjithë procedurave të divorceve, ku në total ishin 1201.
U arrit në përfundimin “Koha mesatare për një procedurë divorci në 2019, në Gjykatën e qarkut të Tiranës ishte 150 ditë. Procedura e divorcit në rastin e subjektes në rivlerësim (Elizabeta Imeraj” mori 43 ditë. Këto numra ndoshta tregojnë për një trajtim preferencial të çështjes në dorë”, thuhet në shkresë.
Po ashtu një tjetër pikë që preket është një shumë që u transferua në llogarinë bankare të Elizabeta Imerajt, 7 muaj pas dakordësisë mes çiftit lidhur me kontributin për fëmijët pas divorcit.
“Në përfundim të gjyqit, të dy palët ranë dakord për të paguar një shumë 20.000 lekë në muaj për një fëmijë. Në korrik të 2020-ës, 7 muaj pas vendimit, kur u bë e qartë se ONM-ja nisi të merret seriozisht me çështjen e saj, një shumë prej 480 000 lekë u transferua në llogarinë bankare të subjektes në rivlerësim (Elizabeta Imeraj). Kjo situatë të çon drejt dyshimeve të forta se nuk ka qenë kurrë objektiv i çiftit pagesa në mënyrë efektive e kontributit për fëmijën, derisa arsyet për divorcin nuk reflektojnë realitetin”, thuhet në shkresë.
ONM rikthen edhe njëherë në vëmendje përballjen e prokurores Imeraj me Vetingun, dhe se si ajo mohoi që ish-bashkëshorti dhe kunati të jenë përfshirë në një rast trafikimi dhe prostitucioni në vitin 2002, në qytetin e Romës.
“Ka indicie të forta se ish-bashkëshorti dhe ish-kunati i Imerajt janë përfshirë në Trafikim qeniesh njerëzore dhe organizim prostitucioni në Romë, Itali, në 2002. Kjo ngre implikime serioze te burimet e tyre financiare. Një marrëdhënie e tillë parashtron shqetësime të rënda, sikundër kontaktet me persona që kenë qenë të përfshirë në krim të organizuar. Këto kontakte e bëjnë të pamundur për subjekten në rivlerësim (Imeraj) për të mbajtur pozicionin e saj duke vënë në rrezik besimin e publikut në sistemin e drejtësisë. Megjithatë në Veting Imeraj pretendoi se ish-bashkëshorti dhe ish-kunati nuk ishin personat e përfshirë në veprën penale. Megjithatë dy personat pranë saj kanë të njëjtat emra me ata të përfshirë. Madje kunati ka të njëjtën ditëlindje me personin e përfshirë, dhe bashkëshorti ka të njëjtin muaj dhe ditëlindje me personin e përfshirë, me të vetmin ndryshim vitin e lindjes”, thuhet në shkresë.
ONM thekson gjithashtu se prokurorja Imeraj ka shpallur moskompetencë në rrethana të pakuptimta mbi çështje të caktuara, për të cilat nuk është hetuar siç duhet.
“Mbetet e pakuptueshme përse prokurorja Elizabeta Imeraj dhe ***, e cila shpalli vendimin për moskompetencë mbi çështjen), thekson mungesën e evidencave daktiloskopike në lëndën narkotike të sekuestruar”, thuhet në shkresë. “Pa një hetim të duhur dhe të vazhdueshëm që mund të çonte në grumbullimin e më shumë provave dhe të nxirrte një fajtor potencial për një krime serioz, dhe të nxirrte rolin e **** në aktivitetin e trafikut të drogës”, vijon arsyetimi.
NDIQE LIVE "PANORAMA TV" © Panorama.al
