Donte të mbronte nënën, por përfundoi i plagosur rëndë nga i ati. Pas hetimeve, policia ka zbuluar arsyen e plagosjes së 15-vjeçarit, që rrezikon jetën, pasi një natë më parë u qëllua me armë nga babai.
Sipas policisë, i arrestuari Romi Nako, 47-vjeç, pas një konflikti të çastit, për motive të dobëta dhe në gjendje të dehur ka tentuar të vrasë me armë zjarri, bashkëshorten e tij, shtetasen E.N, 43 vjeç.
Në këtë moment, i ka dalë përpara djali i tij, P.N, 14 vjeç, i cili është qëlluar me një plumb në këmbë, duke marrë dëmtime në pjesën e gjurit.
Djali ka marrë ndihmë mjekësore, në Spitalin Rajonal të Korçës dhe më pas u dërgua për në Spitalin e Traumës në Tiranë, për mjekim më të specializuar, ku ndodhet në gjëndje të rëndë shëndetësore.
Policia në cilësinë e provës materiale sekuestroi: Një armë zjarri automatike, model 56, kalibri 7.62mm, me nr 17002271, me 29 fishekë, model 56; Katër krëhëra që iu gjetën gjatë kontrollit të baneses; Një gëzhojë fisheku model 56, kalibri 7.62 mm si edhe 190 copë fishekë luftarakë, model 56.
Materialet i kaluan Prokurorisë të Rrethit Gjyqësor Korçë, për veprat penale: “Vrasja për shkak të marrëdhënieve familjare” mbetur në tentativë, “Plagosja e rëndë me dashje” si dhe “Prodhimi dhe mbajtja pa leje e armëve luftarake dhe e municionit” .
NDIQE LIVE "PANORAMA TV" © Panorama.al