“Bashkëpunimi i nisur do të jetë vlerë e shtuar për ngritjen e kapaciteteve profesionale”- Kreu i KLSH takohet me delegacionin e Agjencisë Anti-Korrupsion të Italisë

Nov 18, 2021 | 19:50
SHPËRNDAJE

Kryetari i Kontrollit të Lartë të Shtetit,Arben Shehu priti në ambientet e KLSH-së ekspertët e Agjencisë Anti-Korrupsion të Italisë (ANAC), Filippo Romano dhe Alex di Staso.

klsh1

Takimi u zhvillua në kuadër të bashkëpunimit të nisur midis KLSH-së, OSBE-së dhe ANAC për forcimin e kapaciteteve profesionale të audituesve të KLSH-së në fushën e auditimit të procedurave të prokurimit dhe partneritetit publik-privat.

Shehu i falënderoi ekspertët për ndarjen e eksperiencës së vyer të ANAC me audituesit e KLSH-së në sesionet e trajnimit të zhvilluara në datat 15-17 nëntor 2021 dhe nënvizoi se KLSH është e angazhuar për një bashkëpunim cilësor me organet e drejtësisë për referimin e rasteve të shkeljeve të procedurave të prokurimit. Ai theksoi se KLSH vlerëson çdo informacion i cili trajton çështje të shpërdorimit të fondeve publike, duke veçuar raportimet e mediave për çështjet që lidhen me prokurimin publik dhe koncesionet. Shehu u shpreh se KLSH vlerëson aktivitetin dhe eksperiencën e ANAC dhe ky bashkëpunim i sapo nisur midis dy institucioneve do të jetë një vlerë e shtuar për ngritjen e kapaciteteve profesionale të audituesve të KLSH-së, i cili nëpërmjet shkëmbimit të informacioneve me ANAC për auditime konkrete synon të thellojë luftën pa kompromis kundër korrupsionit.

Romano vlerësoi aktivitetin dhe qasjen e KLSH për të qenë një institucion aktiv në referimin e fenomeneve korruptive me fondet publike tek institucionet ligjzbatuese dhe u shpreh se stafi i KLSH ka një bërthamë shumë të mirë audituesish të cilët kanë njohuri të thelluara në fushën e prokurimit publik. Romano theksoi se trajnimet e tre ditëve të fundit i shërbyen shkëmbimit të eksperiencave që lidhen me ligjin për prokurimin publik, proceset dhe pikat kritike të tij, risqet e korrupsionit, modalitetet e hetimit të aplikuara nga ANAC, dhënien dhe ekzekutimin e kontratave, dëmin ekonomik të shkaktuar nga procedurat e prokurimit, kostot e planifikuara dhe kosto efektive për ekzekutimin e kontratës.

Në tre ditët e trajnimit të zhvilluara në Tiranë me ekspertë të ANAC morën pjesë 50 auditues të KLSH-së. Bashkëpunimi i KLSH-së me ANAC do të vijojë me zhvillimin në fillim të vitit 2022 të sesionit trajnues, i cili do të ketë në fokus analizën e shpeshtësisë së shkeljeve të konstatuara në procedurat e prokurimit dhe rekomandimet për autoritetet kontraktore.

© Panorama.al

Te lidhura