Kreu i Grupit Parlamentar Socialist, Taulant Balla, foli për herë të parë në lidhje me deklaratat e bëra nga presidenti ukrainas Volodymir Zelensky në Kuvendin e Shqipërisë, ku kërkoi bllokimin e porteve shqiptare për anijet ruse, si dhe bllokimin e bankave ruse.
Balla u shpreh se qeveria shqiptare është e pozicionuar qartë kundër agresorit rus, dhe si e tillë do të ndërmarrë të gjitha hapat në mbështetje të Ukrainës.
Nga ana tjetër, Balla e quajti një tullumbace të lëshuar në ajër, kërkesën e ish-kryeministrit Berisha për të ndaluar vizat për të gjithë qytetarët rusë.
“Shqipëria do të ndërmarrë të gjitha hapat sikurse dhe kryeministri Rama bëri me dije në fjalimin e tij.
Të merremi me gjëra serioze dhe jo me tullumbace populiste. Nuk e kam dëgjuar çfarë ka thënë zoti Berisha. Zoti Berisha nuk ekziston për mua, nuk do t;i përgjigje asnjë pyetjeje që ka fjalën Berisha brenda.
Nëse do ta dëgjoni fjalën e kryeministrit Rama keni të gjitha hapat që do të ndërmarrë Shqipëria në mbështetje të Ukrainës, së bashku me aleatët e tjerë. Qeveria shqiptare do të jetë në valën e parë të vendeve që dëmtojnë ekonominë ruse dhe agresorin. Ne nuk i japim vlerë tullumbaceve që lëshon Sali Berisha. Në pamundësi për tu marrë në konsideratë Saliu mbush tullumbace dhe i lëshon”, tha.
NDIQE LIVE "PANORAMA TV" © Panorama.al
