Presidentja e Kosovës, Vjosa Osmani, ka thënë se Kosova i dha qytetarëve të komunave të veriut mundësinë që t’i largojnë kryetarët aktual dhe t’i zgjedhin kryetarët e rinj.
Përmes një postimi në Facebook ajo ka shkruar se qytetarët në masë të madhe nuk e shfrytëzuan këtë mundësi.
Sipas saj, për fat të keq, kjo kryesisht ndodhi për shkak të presionit të Beogradit, të ekzekutuar nga Lista Serbe dhe strukturat ilegale kriminale.
Osmani thotë se Serbia kreu ndërhyrje të paligjshme në një proces zgjedhor të një shteti tjetër dhe Vuçiç shkeli fjalën që ua kishte dhënë partnerëve ndërkombëtarë.
“Kosova sërish dëshmoi maturi, organizim e respektim të plotë të ligjeve e kushtetutës, duke ju ofruar të gjitha komuniteteve, pa dallim, mundësinë që ata të zgjedhin vetë se kush dëshirojnë t’i përfaqësojë. E falënderoj Komisionin Qendror të Zgjedhjeve, institucionet tona të sigurisë, si dhe partnerët tanë për punën, përkushtimin dhe bashkëpunimin. Me organizimin e procesit të sotëm, Kosova i ka plotësuar të gjitha kushtet e kërkuara nga BE-ja. Masat e padrejta kundër Kosovës duhet të hiqen menjëherë”, ka shkruar Vjosa Osmani.
NDIQE LIVE "PANORAMA TV" © Panorama.al
