Blerje e automjeteve, karburantit, orendive të zyrave dhe çdo shpenzim tjetër, tashmë Kryeministria dhe ministritë e tjera do t’i realizojnë nëpërmjet Agjencisë së Blerjeve të Përqendruara, shkruan “Panorama”.
Kjo Agjenci do të jetë në varësi të Ministrisë së Brendshme dhe nga drejtori që është aktualisht, do të ngrihet në nivel Agjencie, e cila do të ketë një buxhet të sajin, stemë dhe vulën.
Kjo Agjenci, që do të koordinojë dhe miratojë blerjet e qeverisë dhe të ministrive, në varësi do të ketë një drejtor të përgjithshëm, i cili emërohet dhe shkarkohet nga ministri i Brendshëm. Punonjësit e Drejtorisë së Përgjithshme të Prokurimeve të Përqendruara, aktualisht pjesë e strukturës së Ministrisë së Brendshme, do të vazhdojë detyrën deri në ngritjen e Agjencisë së re.
Në vendimin e qeverisë theksohet se punonjësit aktualë të kësaj drejtorie, në rast ristrukturimi institucioni, për ta do të zbatohen dispozitat e legjislacionit për nëpunësin civil.
“Për nëpunësit civilë aktualë të Drejtorisë së Përgjithshme të Prokurimeve të Përqendruara, në rastin e ristrukturimit të institucionit, zbatohen dispozitat e legjislacionit për nëpunësin civil. Deri në fillimin e funksionimit të plotë të Agjencisë, sipas këtij vendimi, Drejtoria e Përgjithshme e Prokurimeve të Përqendruara vazhdon funksionimin e saj sipas strukturës dhe organikës së miratuar”, thekson vendimi i qeverisë.
BLERJET
Agjencia e Blerjeve të Përqendruara do të marrë në dorë prokurimet e rëndësishme nga 1 janari i vitit të ardhshëm, blerje që kanë të bëjnë me mirëmbajtjen e automjeteve apo mirëmbajtjen e rrugëve.
“Agjencia e Blerjeve të Përqendruara planifikon dhe kryen procedurat e prokurimit për mallrat dhe shërbimet e mëposhtme, duke filluar nga data 1 janar 2019: a) Riparim, mirëmbajtje e sistemit ngrohje-ftohje; b) Riparim dhe mirëmbajtje automjetesh; c) Mirëmbajtje impiantesh elektrike; ç) Shërbim i ruajtjes dhe sigurisë fizike; d) Blerje artikujsh ushqimorë; dh) Blerje pajisjesh kondicionimi; e) Shërbim gjelbërimi; ë) Shërbim mirëmbajtjeje rutinë dhe dimërore të rrugëve”, thekson vendimi i qeverisë.
AGJENCIA E RE
Këshilli i Ministrave vendosi:
1. Ngarkimin e Agjencisë së Blerjeve të Përqendruara, si organ qendror blerës, për prokurimin e fondeve buxhetore, me vlerë mbi kufirin monetar të prokurimeve me vlera të vogla, në emër dhe për llogari të Kryeministrisë, ministrive, institucioneve në varësi të Kryeministrit e të ministrave të linjës, për blerjen e mallrave dhe të shërbimeve, si më poshtë vijon:
1.1. Blerje automjetesh;
1.2. Blerje karburanti, përveç vajgurit Jet A1;
1.3. Blerje materialesh kancelarie;
1.4. Blerje orendish dhe pajisjesh për mobilim zyrash;
1.5. Blerje materialesh të ndryshme për pastrim;
1.6. Blerje uniformash dhe elementesh të tjera përbërëse të tyre;
1.7. Blerje këpucësh;
1.8. Blerje pjesësh këmbimi për automjete, për shërbimet profilaktike;
1.9. Blerje tonerash;
1.10. Sigurim automjetesh;
1.11. Shërbim gatimi dhe shpërndarje ushqimi;
1.12. Shërbim pastrimi;
1.13. Shërbim lyerjeje dhe mirëmbajtjeje ndërtesash;
1.14. Riparim dhe mirëmbajtje automjetesh;
1.15. Botime, printime dhe materiale shtypshkrimi;
1.16. Blerje materialesh të buta dhe veshmbathje;
1.17. Riparim, mirëmbajtjeje sistemi të ngrohje-ftohjeve;
1.18. Mirëmbajtje impiantesh elektrike;
1.19. Blerje pajisjesh laboratorike, me përjashtim të atyre mjekësore;
1.20. Shërbime dezinfektimi;
1.21. Shërbim i ruajtjes dhe i sigurisë fizike;
1.22. Blerje artikujsh ushqimorë;
1.23. Blerje pajisjesh kondicionimi;
1.24. Shërbim gjelbërimi;
1.25. Shërbim mirëmbajtjeje rutinë dhe dimërore të rrugëve.
2. Përjashtimisht, lejohet:
2.1 Ministria e Mbrojtjes t’i realizojë vetë procedurat e prokurimit për:
a) blerje uniformash, veshmbathjesh dhe elementesh të tjera përbërëse të tyre;
b) blerje këpucësh.
2. Ministria e Mbrojtjes dhe institucionet e saj të varësisë të realizojnë vetë procedurat e prokurimit me objekt “Riparim dhe mirëmbajtje automjetesh”.
3. Përjashtohen nga zbatimi i këtij vendimi përfaqësitë diplomatike dhe konsullore të Republikës së Shqipërisë, të akredituara jashtë vendit.
4. Lidhur me objektet e përmendura në pikat 1.6, 1.11, 1.13 dhe 1.19, të pikës 1, të këtij vendimi, Agjencia e Blerjeve të Përqendruara do të qendërzojë/do të fillojë kryerjen e procedurave të prokurimit me paraqitjen e çdo kërkese të paraqitur nga autoritetet kontraktore.
5. Autoritetet kontraktore, institucionet e përmendura në pikën 1 të këtij vendimi, brenda 5 (pesë) ditëve nga hartimi i regjistrit të parashikimit të procedurave të prokurimit, të dërgojnë në Agjencinë e Blerjeve të Përqendruara, si organ qendror blerës, të dhënat teknike e sasiore dhe fondin përkatës, për mallrat e shërbimet përkatëse. Agjencia e Blerjeve të Përqendruara duhet të informojë Agjencinë e Prokurimit Publik në çdo rast, kur konstaton mosrespektimin e afatit kohor të përcaktuar në këtë pikë.
NDIQE LIVE "PANORAMA TV" © Panorama.al
