Një person, pronar i një mjeti lundrues në plazhin e Jalës, është gjobitur gjatë ditës së sotme, për shkak se ka lundruar me gomone jashtë perimetrit të përcaktuar duke rrezikuar jetën e pushuesve.
Lajmin e ka bërë të ditur Policia përmes një njoftimi, ku thuhet se atij i është ndaluar mjeti lundrues, si edhe është gjobitur me një masë administrative 100 000 lekë të rinj.
Sakaq, kontrollet vijojnë në të gjithë hapësirën ujore të vendit, ndërsa Policia e Shtetit apelon për drejtuesit e mjeteve lundruese që ta kryejnë këtë aktivitet, pas pajisjes me dokumentacionin përkatës dhe të respektojnë me rigorozitet perimetrin ujor të sigurisë për pushuesit.
Njoftimi i policisë:
Lundroi me gomone, jashtë perimetrit të përcaktuar dhe rrezikoi jetën e pushuesve, ndëshkohet me masë administrative 100 000 lekë të rinj dhe i bllokohet gomonia.
Në vijim të kontrolleve në të gjithë vijën bregdetare, me qëllim garantimin e sigurisë së jetës së qytetarëve dhe të pushuesve, shërbimet e Stacionit të Policisë Kufitare Dhërmi, në bashkëpunim me ata të Njësisë Policore Detare, pas informacioneve të marra se një mjet lundrues kishte shkelur perimetrin e sigurisë, kanë shkuar menjëherë në zonën e Jalës ku kanë konstatuar mjetin lundrues gomone që lëvizte jashtë perimetrit të caktuar për këtë aktivitet.
Menjëherë, shërbimet e Policisë Kufitare kanë bërë bllokimin e mjetit lundrues, si dhe kanë ndëshkuar drejtuesin e tij, shtetasin I. B., me masë administrative 100 000 lekë të rinj.
Kontrollet vijojnë në të gjithë hapësirën ujore të vendit.
Policia e Shtetit apelon sërish për drejtuesit e mjeteve lundruese që ta kryejnë këtë aktivitet, pas pajisjes me dokumentacionin përkatës dhe të respektojnë me rigorozitet perimetrin ujor të sigurisë për pushuesit.
NDIQE LIVE "PANORAMA TV" © Panorama.al
