Kryetari i Partisë Demokratike, Lulzim Basha, deklaroi dje se do të bashkëpunojë me qeverinë për të realizuar platformën e opozitës, e cila përfshin uljen e taksave dhe heqjen e kamatëvonesave të faturave të energjisë elektrike.
Në takimin e zhvilluar dje në Durrës, Basha theksoi se më 21 qershor do të votohet jo vetëm për bashkitë, por do të jetë një votë për ofertën kombëtare të PD-së. Ndaj Basha theksoi se “Me votën e 21 qershorit, qeveria do të pranojë platformën tonë ose përndryshe do të largohet”.
BASHKËPUNIMI
Gjatë takimeve në Lezhë dhe Shën Koll, kryetari i PDsë, Lulzim Basha, ka shprehur gatishmërinë për të bashkëpunuar me qeverinë, nëse ajo do të pranojë ofertën e PD.
“Po të pranojnë platformën tonë për uljen e çmimit të energjisë me 25% dhe faljen e kamatë-vonesave për energjinë e ujin anembanë Shqipërisë, për uljen e taksës në nivelin më të ulët në Ballkan, 9%, për rritjen e rrogave e pensioneve përtej indeksimit të inflacionit, për financimin me prioritet të sektorëve të diskriminuar, siç është sektori i bujqësisë, turizmi, për nxitjen e punësimit rinor, përmes një regjimi veçanërisht lehtësues për bizneset që hapin vende pune për të rinjtë, ne jemi gati të bashkëpunojmë sepse për ne pushteti nuk është qëllim më vete, por është shërbimi ndaj jush”, tha Basha gjatë prezantimit të kandidatit të PD-së Fran Frrokaj.
Kryetari i PD-së theksoi se në Kuvend, opozita i dha mundësinë maxhorancës të votonte për premtimet e dhëna në fushatën e vitit 2013 por amendamentet u rrëzuan.
Në hapjen e fushatës së republikanëve në Durrës, Basha e cilësoi kandidaten e opozitës Grida Duma si “emblematikja e nisjes së re”.
