Këshilli i Evropës ka publikuar Raportin për Kosovën, ku ka listuar një numër të madh rekomandimesh për të përmirësuar situatën në fusha të ndryshme.
KiE, ku Kosova tashmë ka dorëzuar aplikimin për anëtarësim, ka kërkuar që të implementohet vendimi i Gjykatës Kushtetuese të Kosovës për pronat e Manastirit të Deçanit.
Gjithashtu ka kërkuar që të respektohet plotësisht pavarësia e sistemit të drejtësisë duke u përmbajtur nga “kritikat e panevojshme që minojnë besimin në drejtësi”.
Në raport kërkohet që të vazhdohen përpjekjet për reforma në bashkëpunim me Këshillin e Evropës dhe duke respektuar plotësisht standardet evropiane.
Përveç këtyre, Këshilli i Evropës ka kërkuar që institucionet e Republikës së Kosovës të përmbahen nga përdorimi i forcave speciale të Policisë së Kosovës për detyra të përditshme në Veri dhe të sigurojë që forcat speciale dërgohen atje vetëm në bashkëpunim të ngushtë me KFOR-in dhe EULEX-in.
Gjithashtu Këshilli i Evropës ka kërkuar që në mënyrë urgjente të adresohet mungesa e një qasjeje gjithëpërfshirëse dhe të koordinuar për çështjet e pakicave.
