Kreu i Shtetit, Ilir Meta ishte sot i pranishëm në ceremoninë e nënshkrimit të Protokollit të Bashkëpunimit të nëntë komunave në Itali, të rajoneve të Puljas, Molises, Kampanias dhe Abrucos, me qëllim mbrojtjen dhe promovimin e identitetit dhe trashëgimisë së kulturës arbëreshe.
Në faceboo, ndërsa shpërndanë foto nga ceremonia, Meta shkruan se ruajtja e “kësaj pasurie të përbashkët kulturore”, i forcon edhe më shumë marrëdhëniet e shkëlqyera të Shqipërisë me Italinë.
Postimi i plotë i Presidentit Meta:
Angazhimi i nëntë komunave të rajoneve të Puljas, Molises, Kampanias dhe Abrucos për të bashkëpunuar me qëllim mbrojtjen dhe promovimin e identitetit dhe trashëgimisë së jashtëzakonshme të kulturës arbëreshe, është padyshim një ngjarje e gëzuar që meriton vlerësim dhe mbështetje maksimale.
I lumtur të merrja pjesë në ceremoninë e nënshkrimit të këtij Protokolli Bashkëpunimi, për të shprehur edhe njëherë mirënjohjen e thellë për angazhimin e shtetit italian, nga niveli qendror dhe deri në atë lokal, për ruajtjen e kësaj pasurie të përbashkët kulturore, që i forcon më shumë marrëdhëniet e shkëlqyera të Shqipërisë me Italinë.
NDIQE LIVE "PANORAMA TV" © Panorama.al
