Kjo është atmosfera sot në Krastë të Elbasanit, në lagjen ku ndodhi vrasja e trefishtë dhe me 7 të plagosur mbrëmjen e së mërkurës.
Siç shihet edhe nga fotot e gazetarëve të “Panorama” në vendngjarje, në lokalin që 4 autorët qëlluan me breshëri kallashnikovi ka vetëm automjete pranë servisit në pronësi të viktimës Sokol Çapja, dhe shiritat e policisë me mbishkrimin skenë krimi, që kanë rrethuar lokalin ku ndodhi masakra.
Atmosferës së zymtë i është bashkuar edhe koha gri, me reshje shiu që kanë nisur që mbrëmë.
Edhe në hotelin në pronësi të Sokol Çapjes, nuk ka lëvizje, teksa njerëzit janë strukur në shtëpi.
Pranë lokalit ku ndodhën vrasjet shihen nga fotot edhe vilat e familjeve të fisit Çapja. Këta të fundit jetojnë pranë njëri-tjetrit në banesat që i kanë ndërtuar prej vitesh.
Policia e Shtetit është ngritur e tëra në këmbë dhe po vijon kontrollet në çdo vend të dyshimtë ku dyshohet se mund të jenë fshehur autorët. Ngjarja sipas burimeve zyrtare ka motiv hakmarrjen, pasojë e një kalvari të gjatë mosmarrëveshjes mes dy fiseve ndër vite.
