Partia Demokratike ka depozituar në Kuvend, kërkesën për ngritjen e Komisionit për Reformën Zgjedhore. Gazetari i Panorama.al, Maringlen Kume ka siguruar kërkesat e demokratëve të cilët duan hartimin e ndryshimeve kushtetuese dhe të kuadrit ligjor.
PD kërkon që ky komision të trajtojë rekomandimet e raporteve të OSBE-ODIHR si për zgjedhjet e 25 prillit 2021, dhe të zgjedhjeve të mëparshme të patrajtuara, rekomandimeve të institucioneve përgjegjëse për zgjedhjet dhe partive politike parlamentare.
Demokratët duan që anëtarësia e këtij komisioni të formohet me pjesëmarrjen e partive parlamentare me përbërje të barabartë mes shumicës dhe pakicës si dhe zgjatjen e veprimtarisë së saj për një afat 6 mujor që nga data e miratimit.
Kërkesat e plota të PD-së:
1. Ngritjen e një Komisioni të Posacëm të Kuvendit për Reformën Zgjedhore.
2. Komisioni ka për detyrë hartimin e ndryshimeve kushtetuese dhe të kuadrit ligjor zgjedhor për trajtimin e rekomandimeve të raporteve të OSBE/ODIHR-it për zgjedhjet e 25 Prillit 2021 dhe zgjedhjeve të mëparshme të patrajtuara, rekomandimeve të institucioneve përgjegjëse për zgjedhjeve, partive politike parlamentare dhe organizatave jofitimprurëse.
3. Anëtaësia e Komisionit formohet me pjesëmarrjen e partive parlamentare, me përbërje të barabartë mes shumicës dhe pakicës.
4. Komisioni e ushtron veprimtarinë për një afat 6-mujor nga data e miratimit të këtij vendimi.
Duke ju falenderuar për bashkëpunimin.
NDIQE LIVE "PANORAMA TV" © Panorama.al