Gazetarja Rudina Xhunga i ka bërë apel qytetarëve që janë përfshirë nga paniku për shkak të situatës në botë dhe në vende pranë nesh në rajon, që si pas tërmetit të rëndë të 26 nëntorit, duhet të dëgjohen specialistët, pasi janë ata që na vrasin frikën.
E ftuar në rubrikën ‘Opinion’ në News24, Xhunga vuri theksin se koronavirusi nuk pyet për ndarje politike, ndaj “është koha të bëhemi bashkë. Ne jemi shumë pak për t’u ndarë”.
E ke ndjerë panikun?
Patjetër, jemi të përfshirë të gjithë. Ndikohemi emocionalisht. Kur u dha mesazhi zanor, thash ok, presim reagimin e MSH, për të qenë e sigurtë. Shteti duhet të reagojë në raste të tilla, me ata që panikosin njerëz. Ishte veprim i dënueshëm veprimi i shkollës që u mbyll, s’mund të mbyllësh shkollën me vendimin tënd, duke panikosur fëmijët dhe për ta hapur kërkon lejen e ministrisë. Shkollat mund të mbyllen, nëse vjen koronavirusi, por dikush duhet të vendosë.
Dy gjëra kam kuptuar, në këto raste si pas tërmetit ashtu edhe tani, nevojën e madhe për specialistë, dhe shteti i mirë apo i keq te shteti shkojmë tek e fundit. Pra, u shtoftë vëmendja ndaj nevojës për të forcuar shtetin dhe publiken.
Ka akuza që qeveria duhet të ishte përgatitur më parë, si po e menaxhon qeveria këtë situatë ?
Unë gëzohem që Ministria e Shëndëtesisë është e angazhuar për të ndalur koronavirusin. Besoj te shteti kur kam një nevojë në cdo lloj moment, nga kushdo qoftë ai që e drejton atë. Shoh edhe deklarata politikanësh, por do i thosha Metës, Bashës, Ruçit, Ramës, kujdo zoti e zonje në këtë vend: Bëhuni bashkë sepse ai nuk bën dallime, nuk do t’ja dijë a ka të drejtë Dvorani apo Meta, Koronavirusi i vret të gjithë. Ndaj është moment i mirë për të mos dhënë mend në televizion, sepse mund të hedh unë helm sa të duash në portal e të bëj para me ca klikime, po c’i dua nëse më vjen koronavirusi në shtëpi. Ndaj e mira është të bashkohen, kjo do na gëzonte më shumë.
Këshillat nga OBSH, sa të zbatueshme i shihni te qytetarët ?
Do isha dakord në momentin që po të isha duke drejtuar ndonjë emision do thoja më mësoni si të lajmë duart. Të flasim për gjërat e thjeshta. Dje një vajzë që drejton një klikinë të njohur më tregoi se shkonin dhe i kërkonin, kam prekur një kinez ca të bëj.
Ndaj unë mendoj se media duhet të përqëndrohet në tre shtylla: të bëhemi njerëzor, të intervistojmë profesionistë dhe te besojmë të shteti.
Flitet për autokarantinën për njerëzit e dyshuar… Si e ke parë situatën?
S’di çfarë të them. Tani po dëgjojmë për një lloj karantinimi tjetër, po karantohet një qytet. Nuk besoj te ky autokarantimi në shtëpi. Gazetarët duhet të jenë kritikë, të flasin, por jo të mallkojnë dhe sulmojnë. Nuk është momenti të zihemi tani për ku është karantina. Uroj mos t’i ndodhë ndonjë gazetari të raportojë live nga karantina.
Është sulmuar situata politikisht?
Kjo është normale. Jemi një popull jo krejt urban, ne shfrytëzojmë cdo gjë për politikë. Por nuk ndodh vetëm këtu, në Kinë ka probleme, Italia ka probleme të forta. Koronavirusi nuk pyet për ndarje politike, është koha të bëhemi bashkë. Ne jemi shumë pak për t’u ndarë.
Po zërat që flasin se mund të kenë raste, por mbahen të fshehta?
Dua ta besoj që nuk kanë pse të na gënjejnë. Problemi është pse duhet ta fshehim, ku i çuan? I vranë?
Si i ke parë zhvillimet e kësaj jave, që lamë pas, kur Presidenti ka thirrur një manifestim?
Javën e kaluar, çdo fjalë që thoshte Meta e Kryemadhi kishte pafund vëmendje, por këtë javë ra vëmendja, pasi ka kaluar te koronavirusi. Mbase deri më 2 mars do e kemi harruar sërish koronavirusin. Sa ka apo jo të drejtë Meta, do ta shohim më 2 mars. Do jetë ditë domethënëse. Të shohim a do dijë Meta të mbledhë njerëz, t’ua shpjegojë se ka të drejtë. Kjo është një lojë politike, që zgjat prej vitesh dhe që s’do ketë fund asnjëherë, për sa kohë palët mbajnë njëri-tjetrin. Nuk di të të them sa njerëz mund të ketë në bulevard më 2 mars. Çdo gjë mund të ndodhë deri më 2 mars, mund të shpallet pademi, mund të shpiket vaksina e koronavirusit. Shqiptarët punojnë në mënyrën e tyre dhe e dinë që e kanë në dorën e vet fatin e tyre.
NDIQE LIVE "PANORAMA TV" © Panorama.al
