Bashkimi Evropian është i gatshëm të miratojë më shumë sanksione kundër Rusisë nëse presidenti Vladimir Putin nuk e ndal luftën në Ukrainë, tha të premten presidentja e Komisionit Evropian, Ursula von der Leyen.
Më tej zyrtarja e lartë e BE u shpreh e vetëdijshme se ky konflikt është shumë larg përfundimit, duke i bërë thirrje Putinit që të ndalë luftën.
“Ne e dimë se ky konflikt është larg përfundimit dhe për të qenë shumë e qartë, ne jemi gati të marrim masa të mëtejshme të rrepta nëse Putini nuk ndalon dhe nuk e kthen luftën që ka nisur”, tha ajo së bashku me Sekretarin e Shtetit të SHBA Antony Blinken në Bruksel.
“Falë këtij koordinimi me Shtetet e Bashkuara, ne së bashku kemi projektuar, zhvilluar dhe vendosur sanksione në kohë rekord. Sanksionet që demonstrojnë vendosmërinë tonë për ta bërë Putinin të paguajë një çmim për luftën e tij. Ne nuk i marrim lehtë këto masa, por është e qartë se duhet të veprojmë”, shtoi ajo.
Von der Leyen tha se mbi 40 vende tani ishin “pjesërisht ose plotësisht” në përputhje me sanksionet, duke thënë se kjo ishte “dëshmi e vendosmërisë së komunitetit global për të refuzuar këtë pushtim”.
Duke folur pas von der Leyen, Blinken përgëzoi Bashkimin Evropian për reagimin ndaj Rusisë, duke thënë, “ky bashkim është i fortë, është i bashkuar dhe po vepron”.
“Nëse lejojmë që parimet të shkelen pa u ndëshkuar, atëherë ne po hapim një Kuti të Pandorës, në çdo cep të” tha Blinken.
Ai paralajmëroi gjithashtu se lufta në Ukrainë “mund të mos përfundojë së shpejti” dhe se SHBA dhe aleatët evropianë duhet të mbajnë presion të ashpër ndaj Rusisë derisa të përfundojë.
“Fatkeqësisht, tragjikisht, tmerrësisht kjo mund të mos përfundojë së shpejti,” tha ai.
“Ne duhet ta mbajmë këtë derisa të ndalojë, derisa lufta të përfundojë,” shtoi ai.
NDIQE LIVE "PANORAMA TV" © Panorama.al
