Dervishi publikon dokumentin: I ati i Xhufit anëtar i brigadës 5, u dekorua nga jugosllavët për …

Pëllumb Xhufi, i pranishëm në emisionin “Arena” të gazetarit Dritan Hila, ka deklaruar se njerëz si Kastriot Dervishi e përdhosin historinë sepse mundohen të interpretojnë dokumente të së kaluarës dhe i keqinterpretojnë ato.

Ndërkohë ku i fundit ka reaguar sërish ndaj Xhufit, duke bërë publik dokumentin ku tregon se babai Xhufit ka qenë në brigadën e 5-të, brigadë kjo që vepronte në kuadër të divizionit të 5 komunist.

“Fillimisht po e nis nga dekreti i dekorimit të divizionit të 5 komunist, i datës 2.12.1945 nga jugosllavët për shërbimet e shquara që ato i dhanë pushtetit jugosllav.”, shkruan ai në postimin e bërë në Facebook.

Dekorimi i brigadës së 5-të nga jugosllavët

Meqë z.Xhufi aludoi në mënyrë të pavërtetë që kampi i Tepelenës ishte i përbërë nga familjarë të të arratisurve në Jugosllavi (në vitin 1949), në mënyrë që të përbalte të internuarit e atëhershëm si “bashkëpunëtorë të jugosllavëve”, le t’i shohim kush kanë qenë në shërbim të tyre.
Nga sot, do publikoj disa dokumente të brigadës së 5 që vepronte në kuadër të divizionit të 5 komunist, si dhe të këtij të fundit. Në brigadën e 5-të ishte edhe babai i z.Xhufi. Meqë ai kërkoi “agjenturizma” në vitin 1949, le të shohim çfarë kanë bërë ashiqare brigadat komuniste në Kosovë pas largimit të ushtrisë naziste. Fillimisht po e nis nga dekreti i dekorimit të divizionit të 5 komunist, i datës 2.12.1945 nga jugosllavët për shërbimet e shquara që ato i dhanë pushtetit jugosllav.
Forcat komuniste, qysh më 20 nëntor 1944 kaluan kufirin e vjetër dhe u futën e Kosovë. Banorët e Kukësit duhet t’i mbajnë mend mirë veprimet e brigadës së 5-të. Pastaj banorët e Gostivarit, Kërçovës, etj, duhet të kenë gdhendur në mendjet e tyre veprimet policore të brigadave nga Shqipëria.