GJIROKASTER- Një zjarr ka përfshirë kurorën e gjelbër të monumentit më të vizituar në Gjirokastër, kështjellës së qytetit. Zjarri ka rënë në orën 17:30 minuta dhe i favorizuar nga era, është përhapur me shpejtësi në të dy anët e kështjellës. Si vatër e zjarrit është përcaktuar hyrja e tunelit që lidh pjesën muzeale të Pazarit Karakteristik, me lagjen “Manalat”.
Nga mënyra e shpërthimit të flakëve të zjarrit, gjykohet se ai është vendosur qëllimisht nga kalimtarë që shfrytëzojnë këtë rrugë kalimi, pasi zjarri është vendosur në të dy anët e tunelit. Kanë qenë punonjësit e PMNZSH dhe strukturat e Policisë Bashkiake ato që kanë ndërhyrë në mënyrë të rrufeshme duke vendosur nën kontroll përhapjen e mëtejshme të tij.
Falë këtij bashkëpunimi, është evituar përhapja e zjarrit brenda hapësirave të kështjellës, veçanërisht në sheshin ku është ekspozuar një avion amerikan i rrëzuar nga forcat partizane gjatë Luftës së Dytë Botërore, si trofe i epokës së socializmit. Kurora e gjelbër e monumentit më të vizituar të qytetit, është dëmtuar ndërkohë që vetë monumenti ka shpëtuar nga zjarri. Gjatë përpjekjeve për shuarjen e zjarrit, një grup turistësh nga Izraeli, kanë qëndruar në pritje dhe vetëm pasi zjarri është vënë nën kontroll, vijuan vizitën në ambjentet e kalasë.
Në pjesën e pasme të kalasë, janë angazhuar qytetarë të lagjes “Manalat”. Kjo është hera e dytë brenda vitit, që bie zjarr në kalanë e Gjirokastrës pas atij të rënë në muajin shkurt, ku një zjarr aksidental dogji një pjesë të brendshme të zonës.
Piro Nase
NDIQE LIVE "PANORAMA TV" © Panorama.al
