UPDATE/ “I vrava se ata më akuzonin mua për grabitjet e pulave”. Kjo është e vetmja fjali e Ritvan Zykaj dje para trupit gjykues, teksa është pyetur për krimin e rëndë të ndodhur në Resulaj dhe shkakun e tij. 24-vjeçari është sjellë në masa të rrepta sigurie.
Masakra e rëndë me tetë të vrarë që tronditi të gjithë vendin ka sjellë edhe irritimin dhe reagimin e gazetarëve, teksa u lejuan të futeshin dhe ta filmonin në sallë atë deri në mbërritjen e trupit gjykues. “Pse e kreve krimin? Po fëmijët pse i vrave? Pse nuk flet?”, kanë qenë pyetjet e gazetarëve ndaj tij.
Por ai nuk u është përgjigjur asnjërit prej tyre. Teksa filmohej, shkrepeshin foto e i bëheshin pyetje të njëpasnjëshme, 24- vjeçari ka shfaqur sjellje të ftohtë dhe pa asnjë nuancë emocionale, duke parë në sy çdonjërin prej tyre. Ajo që u dallua nga të gjithë ishte syri i djathtë i tij i ënjtur dhe i nxirë.
Por Policia mohon që i arrestuari të jetë dhunuar në ambientet e saj, duke pohuar se kjo mund t’i ketë ndodhur gjatë momenteve të arratisë. Dyshohet se ai mund të jetë rrëzuar apo përplasur në tentativë për t’u shpëtuar prangave.
Gjykata ndërkaq e ka kryer seancën me dyer të mbyllura, duke mos lejuar askënd të jetë i pranishëm. Në ambientet e gjykatës është parë vetëm një djalë i ri, i cili pohoi se ishte i afërm me viktimat. Por ai nuk u la të futej në sallë. Askush tjetër, as familjarët e autorit nuk janë dukur dje në Gjykatën e Vlorës.
“Të varet në mes të sheshit”, ishin thirrjet e qytetarëve jashtë ambienteve të gjykatës, në momentin që furgoni i policisë solli të arrestuarin për masën e sigurisë. Ngjarja me tetë viktima, mes të cilëve edhe dy të mitur, ka tronditur çdokënd aq sa reaguan jo vetëm gazetarët, por edhe avokatët. Mbi 15 avokatë kanë refuzuar ta përfaqësojnë atë. Siç mësohet, ka negociuar vetë kreu i gjykatës së këtij rrethi, derisa është caktuar kryesisht avokati Renato Mehmetaj, duke vonuar kështu rreth 15 minuta nga koha e përcaktuar për nisjen e seancës.
Prokurori Sajmir Smaka i ka vënë në dispozicion gjykatës provat dhe dëshminë e të arrestuarit dhe më pas ka kërkuar masën e sigurisë “arrest në burg”, gjë e cila ka marrë edhe miratim nga gjyqtarja Esmerilda Habilaj.
Sipas burimeve nga Prokuroria, edhe gjatë marrjes në pyetje nga prokurori, i riu ka qenë krejt i ftohtë dhe nuk ka shfaqur në asnjë moment pendesë.
“I vrava se ata më akuzonin për grabitjet e pulave. Më akuzonin shpesh. Kemi pasur edhe konflikte të tjera edhe më përpara, pikërisht për këtë fakt. Ata vazhdimisht më akuzonin vetëm mua për grabitjet. Edhe më përpara kemi pasur konflikte, jo vetëm para vrasjes”, është shprehur 24-vjeçari gjatë marrjes në pyetje nga prokurori.
Ndonëse askush nga të afërmit nuk i ka çuar ndërresa dhe as ka shkuar ta shohë në qeli, dje autori i vrasjes është paraqitur me bluzë tjetër nga sa ishte në momentin e arrestimit. Ai kishte veshur një bluzë të bardhë, të cilën siç, mësohet ia kanë dhënë efektivë të Policisë së Vlorës.
