Me propozim të ministrit të Brendshëm, qeveria ka miratuar vendimin për kompensimin e policëve në lidhje me shpenzimet e transportit të nevojshme për t’u paraqitur në detyrë, në rastet kur shërbimi i punës zhvillohet larg vendit të banimit. “Punonjësi i Policisë së Shtetit, kur caktohet në punë jashtë vendbanimit të vet, përfiton pagesë për kompensim udhëtimi”, thuhet në pikën 1 të vendimit të qeverisë, që është miratuar ditën e djeshme. Pika vijuese e vendimit përcakton masën e shpërblimit financiar për policët, varësisht nga largësia e vendit ku do të ushtrojë detyrën nga vendi i tij i banimit. Në vendim janë dhënë distancat përkatëse dhe masa e shpërblimit për secilën prej tyre. Në pikën 2 të VKM, që pritet të hyjë në fuqi pas botimit në Fletoren Zyrtare, thuhet se “përfitimi i kësaj pagese vazhdon deri në ndryshimin e vendbanimit të punonjësit të Policisë, që nënkupton sistemimin me banesë në territorin e juridiksionit të komisariatit të Policisë apo drejtorisë së Policisë së qarkut ku ai bën pjesë”. Vendimi i djeshëm i qeverisë parashikon edhe mënyrën se si duhet të aplikojnë dhe të kërkojnë efektivat e Policisë për kompensimin në fjalë. Megjithatë, vendimi i qeverisë parashikon edhe masa të tjera në mbështetje të efektivave të Policisë. Në rastet e mbetjes së bashkëshortes pa punë, vendimi parashikon mbështetje financiare për efektivat e Policisë. Po kështu, një tjetër pikë e vendimit parashikon se gratë e efektivave të Policisë kur janë pa punë, duhet të regjistrohen në zyrat e punës për t’u trajtuar në mënyrë prioritare me qëllim punësimin e tyre. “Kur punonjësi i Policisë transferohet për nevoja pune dhe, për këtë shkak, bashkëshortja/i humbet marrëdhëniet e punës, në rast të pamundësisë së punësimit, i jepet një pagesë, deri në çastin e punësimit, në masën 50% të pagës mujore minimale në shkallë vendi, të miratuar nga Këshilli i Ministrave, kur bashkëshortja/i ka vjetërsi pune mbi 1 vit dhe shtesë në masën 5%, të pagës mujore minimale në shkallë vendi, për çdo vit mbi 1 vit, por jo më shumë se paga minimale në shkallë vendi”, thuhet në pikën 5 të vendimit. Në po këtë pikë, thuhet se polici mund të përfitojë 100% të pagës mesatare mujore të vitit të fundit të punës, por jo më shumë se 150 % të pagës minimale në shkallë vendi, të miratuar nga Këshilli i Ministrave, kur bashkëshortja/i ka vjetërsi në punë mbi 10 vjet. Sipas pikës 6 të vendimit të qeverisë, në çdo 6 muaj, njësitë administrative buxhetore të Policisë së Shtetit duhet të dërgojnë në zyrat rajonale të punësimit listën emërore të bashkëshortëve/eve, për trajtimin me përparësi nga këto zyra të punësimit të tyre, në rastet e hapjes së vendeve të lira të punës.
