Operacioni i policisë, që zgjati tetë orë, nisi të martën në mbrëmje dhe vazhdoi edhe orët e para të së mërkurës. Protestuesit ishin të vendosur për të ndaluar autoritetet për projektin e qendrës së re të Stambollit, e cila përfshin prerjen e pemëve në parkun “Gezi”. Protestuesit kanë kërkuar dorëheqjen e Erdoganit, duke e akuzuar atë se po imponon pikëpamjet konservatore mbi një komb sekular. Ndërsa Erdogan i ka akuzuar protestuesit se po përpiqen të prishin me dashje imazhin e Turqisë dhe ekonominë e saj. Ai tha në një prej fjalimeve të tij se protestuesit “po përpiqen të parandalojnë lulëzimin e Turqisë dhe po përdoren nga institucionet financiare dhe grupet mediatike për të dëmtuar ekonominë turke”. Rreth pesë mijë veta janë plagosur dhe tre persona kanë humbur jetën në protesta. Sheshi “Taksim” dje në mëngjes ishte pothuajse i boshatisur, pasi buldozerët pastruan mbeturinat e barrikadave.
SHBA
SHBA, që e kanë cilësuar më parë Turqinë e Erdoganit si shembulli i demokracisë myslimane nga e cila mund të përfitojnë edhe vende të tjera islamike në Lindjen e Mesme, kanë shprehur sërish shqetësim mbi ngjarjet e fundit dhe kanë kërkuar dialog mes protestuesve dhe qeverisë. “Ne besojmë se stabiliteti afatgjatë i Turqisë, siguria dhe prosperiteti garantohen më mirë duke ruajtur liritë themelore të shprehjes, tubimeve dhe medias së lirë e të pavarur”, tha zëdhënësja e Shtëpisë së Bardhë, Kejtlin Hejden.
