“Xhindosem kur shoh që dominojmë, por lëmë pikë”, Magani: Nuk dorëzohem, kthehemi…

Panorama Sport | Gazeta me e madhe sportive ne vend

Postuar: Nëntor 16, 2019 | 15:35

Besa Kategoria e pare Të fundit

“Xhindosem kur shoh që dominojmë, por lëmë pikë”, Magani: Nuk dorëzohem, kthehemi…

Gugash Magani nuk dorëzohet. Rezultatet janë realisht zhgënjyese, por trajnerit i jep shpresë ky ekip. Loja e mirë dhe rastet e prodhuara e bëjnë peqinasit që të mos heqë dorë dhe të paralajmërojë kthesën. 

gugash magani

“Herët a vonë, do të vijnë edhe fitoret”, kështu deklaron numri një i pankinës së kavajasve, ndonëse është ende “i xhindosur” nga shpërdorimi. Gjatë një prononcimi të dhënë për “Panorama Sport” 54-vjeçari i mëshon faktit se grupi që ai drejton përbëhet nga futbollistë 19-20-vjeçarë.

“Nëse ka njeri që është i pakënaqur me rezultatet që kemi marrë, ky jam unë. E kam pranuar publikisht përgjegjësinë për humbjen ndaj Shënkollit, siç edhe kam këmbëngulur pas çdo takimi se ekipi im ka shpërdoruar raste pa fund. Dhe e theksoj, kjo ka ndodhur javë pas jave. Vendoseni veten në vendin tim, si mund të ndihem kur ekipi udhëheq dhe del para portës 2-3 herë në raste flagrante. Kushdo pret golin e dytë apo të tretë… por në fund sheh që barazohesh edhe më keq, të mundesh. I pari që ‘xhindoset’ jam unë. Fundja rezultatet teknike gjykojnë trajnerët, jo lojtarët. Në këtë kuptim jam i qetë dhe i garantuar në postin tim, pasi ekipi që drejtoj ka prodhuar e bindur në lojë në çdo ndeshje. Jemi ne që kemi lëshuar pikët dhe jo kundërshtarët ata që e kanë merituar. Ju harroni se mbi 80% të ekipit e kam me moshë 18-20 vjeçare. Besoj nuk është pak ky tregues kur luan sidomos në Ligën e parë”, thotë fillimisht tekniku.

Besa-Kavaje

KTHESA

Gugash Magani mendon që ndaj Devollit do të vijë edhe autokritika dhe nuk ngurron që të japë edhe arsyet që i japin besim. “Loja që ekipi prodhon, dëshira e madhe e të rinjve janë baza ku mbështes besimin tim. Do vazhdoj të punoj fort, ashtu sikurse të kritikoj të besuarit e mi për çdo gabim të tyre. Këta të rinj do rriten me përvojë, me vërejtje dhe me punë. Personalisht jam i bindur se shumë shpejt që javën e ardhshme ekipi do kthehet te fitoret. Unë besoj e pres në këtë që them. Më besoni se pas janarit do keni Besë tjetër. Javë ka plot dhe ne do rikthemi aty ku ju doni e presin të gjithë”, përfundoi trajneri i verdhezinjve.

FERIZ FERIZAJ




Për t’u bërë pjesë e grupit të "Panorama Sport" mjafton të klikoni: Join Group dhe kërkesa do t’ju aprovohet.
KOMUNITETI PANORAMA SPORT: https://www.facebook.com/groups/sportionline/

www.minuta90.com