Pas humbjes me rezultatin 2-1 ndaj Kastriotit në “Play-Off”-in për Kategorinë Superiore, trajneri i Tomorit, Bledar Sinella ka folur pas ndeshjes duke analizuar këtë disfatë ku sipas tij skuadra beratase ka luajtur si e barabartë ndaj krutanëve dhe se pas këtij sezoni ata janë fituesit moral të grupit të tyre:

“Luajtëm si të barabartë dhe jam krenar shumë për djemtë sepse dhanë maksimumin. Pësuam gol në momentin më të mirë tonë. Pjesa e parë ishte shumë e mirë, bëmë dhe një tranversë mund të shënonim dhe ne.

Në sekondën e fundit të pjesës së parë pësuam gol. Goli i dytë ishte një dhuratë nga ana e jonë, ishte një gabim personal i lojtarit kështuqë ekipi kundërshtar realizoi golin e dytë. Normal që pastaj do të hapej loja, do të kërkonim të hidheshim në sulm për të kërkuar golin dhe do të rrezikoje më prapa, por edhe një herë tjetër e riktheksoj se kemi luajtur si të barabartë dhe jam shumë i lumtur për lojën e skuadrës.

Unë mendoj se ishte një sukses ardhja në ‘Play-Off’, dhe mos të harrojmë që me gjithë historinë që vjen nga prapa është një skuadër që sezonin e kaluar kanë milituar në Kategorinë e Dytë dhe tani jemi në Kategorinë e Parë. Një skuadër që vjen nga Kategoria e Dytë arrin deri në ‘Play-Off’-in për Kategorinë Superiore besoj se është sukses.

Nëse vazhdojmë kështu, bashkëpunimi president-trajner-lojtarë në mënyrë që duhet të funksionojë në mënyrë perfektë mendoj që na jep garanci që vitin tjetër të luftojmë për Kategorinë Superiore.

Kampionati nisi shumë vonë dhe u munduam të rikuperojmë në janar duke plotësuar boshlliqet që kishim në disa pozicione, dhe në janar zgjedhjet janë të limituara.

Ne ia arritëm qëllimit bëmë një fazë të dytë dhe të tretë perfektë dhe e kam theksuar dhe herë tjetër dhe po e theksoj dhe sot që jemi fituesit moral të grupit ku morëm pjesë.”

PANORAMASPORT.AL

NDIQE LIVE "PANORAMA TV"

---