Me ndërprerjen e kampionateve, skuadrat u shpërndanë dhe futbollistët u kthyen në shtëpitë e tyre, ndërkohë që një problem më vete është ai i të huajve, që në klubet tona nuk janë të paktë. Dinamo e Kategorisë së Parë është një skuadër që ka shumë të huaj në përpbërje, duke nisur me presidentin, stafin teknik dhe futbollistët.

Deri dje në mëngjes, siç shpjegon për “Panorama Sport” administratori Ermal Barushi, të gjithë italianët e Dianmos kanë qëndruar në rezidencën e skuadrës në Linzë, por tashmë tre prej tyre janë kthyer në Romë.

 

“Gjatë ëksaj kohe, presidenti Marko Pontreli, trajneri Kamarata dhe futbollistët italianë, kanë qëndruar në hotelin e skuadrës në Linzë. Janë larguar drejt Italisë dy futbollistë, Pontreli dhe Dovidio, si dhe një pjesëtar i stafit, për probleme familjare.

Largimi i tyre është bërë i mundur me ndihmën e Ambasadës Italiane në Tiranë, që është marrë me organizimin e udhëtimit.

Tani në Linzë ndodhen trajneri Kamarata, presidenti Pontreli dhe 4 lojtarë, italianët Paterni dhe Ortolani, ekuadoriani Salazar dhe Renato Spahiu, një lojtar shqiptar që ka ardhur nga Greqia”, sqaron Barushi.

Dinamo bën pjesë në Grupin B dhe lufton për qëndrimin në Kategorinë e Parë. Drejtuesit e skuadrës e konsiderojnë të drejtë pezullimin e aktivitetit dhe janë në pritje të vendimeve të tjera nga ana e FSHF-së.

FATJON RUPI – PANORAMASPORT.AL

NDIQE LIVE "PANORAMA TV"

---