Të gjithë kundër Tavekios. Lojtarët e Serisë A, një minutë të ulur në fushë
Krerët e Federatës Italiane të Futbollit nuk duan të mbajnë përgjegjësi lidhur me problemet që ekzistojnë në futbollin italian, për këtë arsye, në 25-26 nëntor lojtarët e serisë A dhe B janë organizuar për të protestuar ndaj presidentit të federatës, Karlo Tavekio.
Ky i fundit e ka bërë të qartë se nuk do ta lëshojë kurrsesi postin e presidentit të federatës, ndaj edhe Damiano Tomasi, presidenti i Shoqatës së Futbollistëve, është larguar në takimin me drejtuesit e federatës, pasi ka kuptuar se asgjë nuk ka për të ndryshuar dhe vetë kreu kërkon të mbajë me çdo kusht postin.
Për këtë arsye, lojtarët e Serisë A dhe B do të protestojnë në 25-26 nëntor në prag të çdo sfide ndaj liderëve të kësaj federate, e cila, sipas tyre, po shkatërron futbollin italian. Gjatë ditës së djeshme, e përditshmja italiane “Corriere dello Sport” ka bërë me dije se lojtarët do të protestojnë në prag të çdo sfide fundjavën e ardhshme duke u ulur në fushën ku do të zhvillohen përballjet dhe do të qëndrojnë atje për një minutë për çdo ndeshje që do të luhet në Serinë A dhe B.
Gjatë muajit të ardhshëm, Federata Italiane e Futbollit do të vendosë nëse do të ketë ndryshime ose jo, por lojtarët nuk presin më asgjë pozitive, pasi e kanë humbur besimin.
NDIQE LIVE "PANORAMA TV"