Te Besa i druhen mbijetesës, Meçja apel ekipit: Fitore ose “play out”, duhet të zgjedhim
Që përballja me Butrintin të merrte kaq vlera në këtë moment, askush nga Besa nuk e kishte besuar. Por ja që verdhezinjtë i bënë llogaritë gabim dhe jo më kot Dorjan Bubeqi “qante” atë trepikësh me Maliqin. Në prag të javës së 27-të, stafi teknik i bën llogaritë me kontigjent gati të plotë.
Themi kështu, pasi në dyshim nëse do të luajë apo jo është vetëm mesfushori Adhjari. Për ta fituar këtë sfidë, detyra kryesore u mbetet sulmuesve që do të jenë në fushë. Flavjo Meçja e ka të qartë këtë dhe jo vetëm që premton maksimumin, por i jep edhe një apel shokëve.
“Bubeqi na e bëri të qartë dhe ne analizë, por edhe ne e dimë që ‘I zoti e nxjerr gomarin nga balta’. Këtu mbërritëm falë nënvlerësimit që i bëmë disa ekipeve. Tani jemi po ne që duhet thjesht të korrigjojmë veten e të bëjmë mirë atë që dimë e mundemi në fushë”, tha fillimisht për “Panorama Sport” sulmuesi. Po a është Besa psikologjikisht e penalizuar në këtë rast? Ka presion grupi para kësaj sfide? Për autorin e 5 golave, aspak:
“Nuk mundet një ekip si Besa të jetë nën presion ndaj një kundërshtari si Butrinti. Ne jemi Besa dhe duhet e do ta tregojmë këtë në fushë. Nëse kemi gabuar, kjo nuk do të thotë se s’kemi grup e mundësi për të mundur sarandjotët. Përkundrazi, gjykoj se i kemi të gjitha mundësitë dhe do të fitojmë. Kërkohet vetëm që secili prej nesh të vlerësojë maksimalisht ndeshjen e të jetë vetvetja. Kemi aq kualitete e përvojë në grup, sa jo Butrintin, por të mundim këdo në Kavajë. Ndaj as që e diskutoj fitoren. Kam folur edhe me shokët dhe të gjithë janë të bindur te fitorja”.
Ndërsa Besa, kur kanë mbetur edhe 4 javë e gjykon kështu këtë sfidë, duhet thënë se edhe Butrinti e ka anti-Besën “trenin” e fundit për të mos rënë një kategori më poshtë. Thënë ndryshe, do të luhet një ndeshje e fortë, por kavajasit kanë më shumë cilësi në ekip dhe nuk do të lejojnë Butrintin t’i surprizojë aspak.
FERIZ FERIZAJ – PANORAMASPORT.AL
NDIQE LIVE "PANORAMA TV"