Dopieta e sulmuesit Saliu Guindo në fitoren ndaj Vllaznisë ka ngrohur stafin e Laçit, pikërisht në momentin më kritik të sezonit, teksa golat e afrikanit duhen më shumë se kurrë. Pas një periudhe të gjatë me probleme, ku forma e tij linte për të dëshiruar dhe më pas erdhi edhe një dëmtim që e la jashtë fushave disa javë, në kampin kurbinas kishin humbur disi shpresat se Guindo do të merrte veten.

Mirëpo, “Këpuca e Artë” e Kategorisë Superiore në sezonin e kaluar u rikthye protagonist atëherë kur fitorja e Laçit duhej me çdo kusht dhe pikërisht në javën e 26-të ndaj Vllaznisë.

Kjo i dha mundësinë stafit teknik, me në krye trajnerin Gentjan Mezani, që të përgatiten të qetë në prag të takimit, të cilin do të luajnë të dielën në stadiumin e Kamzës kundër Kastriotit.

Duke qenë se kundërshtari mbyll tabelën e klasifikimit dhe për të mund të jetë një nga shanset e fundit për të shpresuar te mbijetesa, ky takim edhe bëhet më i vështirë për kurbinasit.

Megjithatë, skuadra e Mezanit gëzon një formë të mirë dhe pret që të marrë tri pikët e radhës në ndeshjen e së dielës. Në këtë takim Laçi nuk ka asnjë lojtar të pezulluar për kartonë apo të dëmtuar, prandaj dhe Mezani ka luksin e përzgjedhjes së formacionit.

Pas dështimit në Kupën e Shqipërisë, klubi bardhezi kërkon me çdo kusht të ngjitet në renditje, në mënyrë që të shpresojë te një vend që do ta çonte në Europë pas përfundimit të këtij sezoni.

PANORAMASPORT.AL

NDIQE LIVE "PANORAMA TV"

---