Laçi luan sot në orën 13:30 ndeshjen e kthimit kundër Tomorit, teksa klubi kurbinas ka zgjedhur kompleksin “Internacional” në Pezë-Helmes për të zhvilluar këtë takim, duke mos preferuar stadiumin e vet, nisur edhe nga gjendja jo e mirë e fushës në muajt e fundit.

Sfida e parë në Berat ka përfunduar me fitoren minimale 0-1 të kurbinasve, falë një goli të Ilirid Ademit në pjesën e parë. Trajneri Mirel Josa pritet të hedhë në fushë një formacion të përzier me lojtarë, që janë aktivizuar më pak këtë periudhë dhe një pjese të titullarëve fiks.

Natyrisht rezultati minimal i ndeshjes së parë nuk është se i jep shumë komoditet Laçit për të bërë rrotacion total, por gjithsesi Josa ka kërkuar nga grupi që të vlerësojë në maksimum kundërshtarin.

Tomori është pjesë e Kategorisë së Parë, por mbetet një ekip pretendent për t’u rikthyer në elitë, prandaj dhe në kampin bardhezi duan të shmangin ndonjë surprizë të pakëndshme.

PANORAMASPORT.AL

NDIQE LIVE "PANORAMA TV"

---