Akademia e Futbollit Luftëtari e nis me fitore 3-0 në Kategorinë e Tretë ndaj ekipit nga Dibra, Drini FK 2004. Pas shkrirjes së Luftëtarit, që këtë sezon duhet të merrte pjesë në Kategorinë e Parë, gjirokastritët e kanë nisur nga niveli më i ulët me emrin AF Luftëtari, të udhëhequr nga Mustafa Hysi në rolin e drejtorit ekzekutiv dhe Dritan Kristidhit si trajner i parë.

Sot në kompleksin e Kamzës u zhvillua ndeshja e parë, e cila mund të konsiderohet historike, për vetë faktin se një klub me kaq traditë si Luftëtari merr pjesë për herë të parë në këtë nivel amator. Bluzinjtë fituan pastër, teksa të tri golat u shënuan në pjesën e dytë nga lojtarë të dalë nga shkolla gjirokastrite si Shefqet Boni (i biri i legjendës Astrit Boni) në minutën e 53-të, Rudion Mahmutajt në minutën e 58-të dhe Eldar Bathës në 78-ën. Synimi i bashkisë Gjirokastër me AF Luftëtarin është ngjitja e shpejtë në Kategorinë Superiore.

Fillimisht gjirokastritët do të militojnë në Kategorinë e Dytë në sezonin 2021-2022, pikërisht pas përfundimit të aktivitetit aktual në Kategorinë e Tretë, ku marrin pjesë 6 skuadra: AF Luftëtari, KF Murlani, Spartaku, Kinostudio, Osumi dhe Drini.

ABDULLA DUSHKU – PANORAMASPORT.AL

NDIQE LIVE "PANORAMA TV"

---