Pas Ilir Latifit, një tjetër sportist me origjinë shqiptare do të jetë pjesë e UFC-së, kategorisë më të lartë të Arteve Marciale Mikse. Bëhet fjalë për Ramiz Brahimajn, ky i fundit do të debutojë në UFC në duelin kundër japonezit Takashi Sato, në eventin që do të organizohet më 27 qershor në Las Vegas.

Në këtë mbrëmje përballja kryesore është ajo ndërmjet Dustin Poirier dhe Dan Hooker, por do të jetë gjithashtu një ditë e shënuar për sportistin me prejardhje shqiptare. Ramiz Brahimaj do të luftojë në kategorinë uelter. Ai regjistron dhjetë përballje në kategoritë e ulëta të arteve marciale mikse, ku ka një bilanc prej 8 fitoresh dhe 2 humbjesh, ndërsa ka triumfuar në 2 nga 3 përballjet e fundit.

Debutimi i Brahimajt në UFC (Ultimate Fighting Championship), ishte parashikuar në qershorin e vitit të kaluar, por për shkak të një dëmtimi duel i tij kundër spanjollit Miguel Baeza në serinë “Contender Series 19” të Dana Ujt, dështoi. Për sa i përket kundërshtarit të 27- vjeçarit shqiptar, ai do të jetë Takashi Sato. Për japonezin kjo do të jetë ndeshja e tretë në UFC, ndërsa në dy sfidat e mëparshme regjistron një fitore dhe një humbje.

Ramiz Brahimaj ka lindur në SHBA, më 17 nëntor të vitit 1992 dhe origjina e tij është kosovare. Tashmë të gjithë adhuruesit shqiptarë të Arteve Marciale Mikse po presin me kureshtje debutimin e sportit kuqezi në kategorinë elitare UFC. Kujtojmë që një tjetër sportist shqiptar i afirmuar në UFC është edhe Ilir Latifi. 36-vjeçari shqiptar, i cili ka lindur në Malmoe të Suedisë, numëron 23 ndeshje në kategorinë UFC, ku ka arritur të fitojë 15 duele, ndërsa ka humbur 8. Sfida e fundit për Latifin ishte më 9 shkurt, kur u mposht nga Derrik Luis.

PANORAMASPORT.AL

NDIQE LIVE "PANORAMA TV"

---