Pakujdesi, sinqeritet gjer në naivitet apo “kapriço” italiane? Gjithsesi, trajneri Xhovani Kolela ka krijuar një ngjarje jo fort të këndshme për opinionin sportiv në Fier. Pas miqësores me Elbasanin, ku Apolonia u mund 1-0, trajneri Kolela, mes të tjerash, është shprehur: “Merkatoja nuk më intereson fare, është pjesë e klubit”. Është kjo fraza e përdorur nga trajneri, që ngjall jo pak diskutime dhe dilema, jo vetëm për sportdashësit fierakë, por mbase edhe krerëve të klubit nuk u tingëllon mirë shprehja:

“Merkatoja nuk më intereson fare, është pjesë e klubit”… Sepse ai, Xhovani Kolela, është trajneri dhe më mirë se ai askush nuk mund të flasë për nevojat e skuadrës në merkato! Është trajneri që teston grupin që ka, analizon gjendjen, përparësitë dhe mangësitë, përcakton pastaj dhe nevojat e karakteristikat e lojtarëve që i nevojiten për çdo pozicion, duke ia servirur kërkesat e tij klubit, por assesi të shprehet si më lart. Veç kësaj, pas ndeshjes me Elbasanin, një kundërshtar shumë më i ri dhe shumë më pa përvojë se Apolonia, Kolela ka thënë mes të tjerash edhe: “Skuadra nuk më pëlqeu. Nuk përdorim si alibi stërvitjen e mëngjesit. Ishim shumë të lehtë në çdo gjë”, dhe pas kësaj janë tifozët fierakë që i thonë trajnerit italian se nuk ka kujt t’i ankohet për atë që vetë Kolela po bën.

Debati i tifozërisë fierake është i ndarë dysh, ku pjesa dërrmuese mban qëndrim mosbesues ndaj Kolelës, ndërsa kahu tjetër kërkon që trajnerit t’i jepet kohë dhe gjykimi të bëhet gjatë kampionatit. Starti – 54-vjeçari e ka marrë drejtimin e Apolonisë më 2 shtator, pas dorëheqjes së detyruar të ishtrajnerit Artan Mërgjyshi. Përpara “gradimit” si kryetrajner, Kolela ishte pjesë e klubit, si drejtor teknik, dhe më pas pranoi ofertën për të drejtuar ekipin në Superiore. Në karrierën e tij, Kolela ka drejtuar disa skuadra italiane gjer në Serinë B, teksa sezonin 2019-2020 ka qenë trajner i Riminit, ekip që u rendit i fundit nën drejtimin e tij dhe u rrëzua në Serinë D.

Çfarë tha kur u prezantua – Xhovani Kolela u shfaq optimist ditën e parë si kryetrajner i Apolonisë. Në praninë e administratorit Olsi Bregu, grupit të lojtarëve, trajnerëve të akademisë dhe stafit të tij, mes të tjerash Kolela asokohe u shpreh: “Unë e kam njohur skuadrën fillimisht përmes pamjeve filmike dhe kam krijuar një përshtypje të parë pozitive për mënyrën e lojës, dëshirën, grupin. Ishte kjo një ndër arsyet kryesore që unë pranova të bëhesha pjesë e këtij klubi si drejtor teknik. Tani më është besuar detyra e trajnerit, një sfidë e re, e vështirë, por jo e pamundur kur jemi të gjithë bashkë. Unë kam rregullat dhe kërkesat e mia, që nuk janë të shumta, por jam fanatik në kërkesën e zbatimit të tyre.

Në grupin tonë ka lojtarë me cilësi shumë të mira, që bën të mundur edhe suksesin e ngjitjes së skuadrës në Superiore. Unë kam besim të plotë te ju dhe, duke u stërvitur me seriozitet e pasion, do të bëjmë mirë dhe do të jemi të suksesshëm edhe në Superiore”. Pra, në fillim Kolela është shprehur i kënaqur me kontingjentin e skuadrës, duke kërkuar përforcime vetëm në fazën defensive, ndërsa deklarata e tij e fundit: “Merkatoja nuk më intereson fare, është pjesë e klubit”, duket se nuk ka lënë shije të mirë edhe te drejtuesit fierakë, pasi një trajner nuk mund të distancohet nga ajo që është esenciale e punës së tij. Ose, le të besojmë që trajneri i Apolonisë nuk ka gjetur dot shprehjen e duhur pas ndeshjes me Elbasanin dhe ka shkaktuar keqkuptim ajo që Kolela ka thënë.

BUJAR RAMA-PANORAMASPORT.AL

NDIQE LIVE "PANORAMA TV"

---