Liga e Europës, Osijeku fiton “derbin e Shqipërisë Etnike” falë golave kuqezi (VIDEO)
Osijeku i Eros Grezdës dhe Muzafer Ejupit ka fituar në ndeshjen e parë të turit të dytë kualifikues të Ligës së Europës ndaj Luzernës së Hekuran Kryeziut me rezultatin 2-0.
Skuadra kroate e ka dominuar totalisht takimin e zhvilluar në shtëpi teksa golat e triumfit u realizuan nga dy futbollistët shqiptarë, Muzafer Ejupi në minutën e 66 dhe Eros Grezda në minutën e 79. Të dy lojtarët e nisën ndeshjen si titullarë, por mesfushori i kombëtares shqiptare u zëvendësua në minutën e 85-të.
Kjo përballje në Ligën e Europës mund të cilësohet si një “derbi i Shqipërisë Etnike”, teksa duke u bazuar në kombëtaret për të cilat luajnë, Grezda përfaqëson Shqipërinë, Ejupi përfaqëson shqiptarët në kombëtaren e Maqedonisë, ndërsa Kryeziu luan për përfaqësuesen e Kosovës.
Ndeshja e kthimit luhet pas një jave në Zvicër, por Osijeku duket favorit për të vazhduar në raundin e ardhshëm pas këtij rezultati.
NDIQE LIVE "PANORAMA TV"