Laçi fiton gjyqin në FIFA, Gabala duhet t’i paguajë kurbinasve për Xhemjs Adenij. Zbulohet shifra
Të shumta janë skuadrat shqiptare që kanë humbur gjyqet me futbollistët e tyre dhe më pas janë detyruar të paguajnë për ta.
Megjithatë nuk është ky rasti i Laçit. Klubi kurbinas ka fituar gjyqin për Xhejm Adeniji, për kalimin e këtij të fundit te skuadra e Gabala në Azerbajxhan. Laçi pak ditë më parë kishte paditur klubin e Gabala, në Dhomën e Zgjidhjes së Konflikteve në FIFA, për parregullsi në transferimin e sulmuesi Xhejms Adeniji.
Pasi mori në shqyrtim çështjen, organi juridik i qeverisë së futbollit botëror vendosi t’i japë të drejtë klubit shqiptar dhe t’i kërkojë Gabalas shlyerjen e detyrimeve brenda 45 ditëve. Bëhet fjalë një shifër modeste, rreth 2 mijë euro.
VENDIMI I FIFA:
Vendimin i Nënkomisionit të Dhomës së Zgjidhjes së Konflikteve të FIFA-s për çështjen Ref. Nr. TMS 6438, që i përket KF Laçi kundër FK Gabala në lidhje me transferimin e lojtarit Segun James Adeniyi.
Nëpërmjet këtij vendimi është vendosur:
Pranimin e padisë së Paditësit KF Laçi.
Detyrimin e të Paditurit FK Gabala, t’i paguajë Paditësit:
– 2,005 Euro kontribute solidariteti plus 5% interesa në vit deri në datën e kryerjes së pagesës si më poshtë:
– për shumën 1,002.5 Euro që nga 31 gusht 2018;
– për shumën 501.25 Euro që nga 3 mars 2019;
– për shumën 501.25 Euro që nga 31 gusht 2019.
Paditësi duhet t’i njoftojë menjëherë të Paditurit numrin e llogarisë bankare, në të cilën i Padituri duhet të kryejë pagesën.
I Padituri duhet të vërtetojë kryerjen e pagesës në postën elektronike në adresën [email protected].
Në rast se shuma objekt detyrimi, (përfshirë të gjithë interesin e zbatueshëm) nuk paguhet nga i Padituri brenda 45 ditëve, nga njoftimi i numrit të llogarisë bankare nga ana e Paditësit, do të lindin pasojat e mëposhtme:
Të Paditurit do t’i ndalohet regjistrimi i lojtarëve të rinj si në nivel kombëtar ashtu dhe në nivel ndërkombëtar për 3 sezone transferimi të njëpasnjëshme.
Ndalimi do të hiqet menjëherë, pas konfirmimit që shuma e duhur (përfshirë të gjithë interesin e zbatueshëm) është marrë nga Paditësi.
Në rast të mos pagimit në kohë, çështja do t’i përcillet Komisionit të Disiplinës në FIFA për vendimmarrje.
Palët nuk kanë kosto procedurale.