Falimenton Bari, Çani dhe Hysenbelliu mesazh solidarizimi për ish-klubin
Klubi i njohur italian, Bari, nuk arriti të regjistrohej në Serinë B për sezonin 2018-2019, duke qenë se ka borxhe të shumta. Praktikisht falimentoi dhe nuk do të jetë më pjesë e futbollit profesionist në Itali, në një kohë që ka histori 110-vjeçare.
Ky lajm ka prekur jo pak edhe dy futbollistët shqiptarë që kanë qenë pjesë e Barit në periudha të ndryshme. Bëhet fjalë për Edgar Çanin dhe Fatmir Hysenbelliun, të cilët përmes mesazheve në rrjetin social “Instagram”, janë solidarizuar me klubin puljez.
“Bari meriton më tepër”, – shkruan sulmuesi i Partizanit. Ndërsa Hysenbelliu kishte lënë këtë mesazh për ish-skuadrën: “Ju duhet të ktheheni më të fortë”. Ish-sulmuesi i Partizanit, Tiranës dhe Dinamos në kampionatin shqiptar ka qenë pjesë e ekipit të parë të Barit nga viti 2011 deri në 2013.
