Erzeni përforcon mesfushën, te shijakasit vjen ish-lojtari i Dinamos
Erzeni e ka nisur sezonin me pretendime madhore. Për të qenë të sigurt në arritjen e synimit, ngjitja në Superiore, shijakasit janë përfshirë në merkato, ku deri tani kanë afruar dy lojtarë.
Pas huazimit të sulmuesit të Kombëtares U-21, Fatmir Prenga, nga radhët e Laçit, Erzeni ka afruar një tjetër lojtar nga Superiorja.
Mesfushori Rei Nuriu, duke mos pasur hapësirat e duhura te Dinamoja, ka preferuar që të vihet në urdhrat e trajnerit Dede me shpresën për të dhënë kontributin e tij në realizimin e objektivave të skuadrës shijakase.
Dje Erzeni ka zhvilluar testin e radhës në kuadër të përgatitjeve dimërore, ku në stadiumin “Tofik Jashari” ka pritur Tërbunin e Pukës.
Takimi është fituar nga vendasit me rezultatin 1-0 dhe golin e vetëm për shijakasit e realizoi Xhemalaj në pjesën e dytë të ndeshjes.
Afrimi më i fundit te shijakasit, Rei Nuriu, e nisi titullar testin me pukjanët, të cilët pritet që të përforcohen akoma më shumë gjatë kësaj merkatoje. Alsid Tafili është emri i fundit i lakuar si përforcim te skuadra e trajnerit Elvin Beqiri. Me marrjen e dokumenteve nga Besa, hapet rruga e kalimit të mesfushorit shkodran te Tërbuni.
F. SHEHU – PANORAMASPORT.AL
NDIQE LIVE "PANORAMA TV"