Partizani ka kthyer sytë nga mbrojtja në këtë merkato vere dhe ka piketuar dy lojtarë. Bëhet fjalë për Bekim Didën, shtatlartin e Korabit dhe Andi Hadrojn, anësorin e Bylisit. Dida është një qendërmbrojtës tipik, shtatlartë dhe shumë i saktë në duelet ajrore, ndërsa Hadroj ka treguar energji dhe shtysë pozitive përpara nga krahët e mbrojtjes.

DIDA – 23-vjeçari është një lojtar shumë i ngjashëm me Eneo Bitrin, që u largua nga Partizani në fund të sezonit për të firmosur për Astanën në Kazakistan. I gjatë 1.91 m, Dida ka treguar një performancë të mirë për Korabin në Kategorinë e Parë, duke tërhequr edhe vëmendjen e Partizanit. Aktualisht, mbrojtësi është me pushime, por pritet të rikthehet ditën e sotme në Tiranë për të pasur një takim nga afër me drejtuesit e kuq, të cilët po ashtu do të jenë në kryeqytet pas përfundimit të fazës përgatitore në Ohër. Bisedimet paraprake mes menaxherit të Didës dhe drejtuesve të kuq kanë qenë pozitive. Sezonin e shkuar Dida luajti 20 ndeshje me Korabin në Kategorinë e Parë, duke i ndihmuar të renditen në vend të dytë dhe duke kapur fazën “play off”. Dida është produkt i akademisë së Kukësit, ku u aktivizua për ekipet zinxhir dhe për ekipin e parë, për të vijuar më pas karrierën te Besa e Kavajës e së fundmi te Korabi.

HADROJ – Është vetëm 22 vjeç, por Hadroj bëri një sezon shumë të mirë në Superiore me fanellën e Bylisit. Anësori i djathtë është produkt i akademisë së Laçit, ku arriti të luajë edhe me ekipin e parë, para se të transferohej në janar të 2019-ës te Bylisi. Në Ballsh 22-vjeçari u shndërrua në një titullar në krahët e mbrojtjes, duke luajtur plot 34 ndeshje, duke shënuar 2 gola dhe duke asistuar një tjetër.

Andi Hadroj mund të luajë në të dyja krahët e mbrojtjes dhe shihet si një alternativë shumë e mirë nga drejtuesit e stafit teknik të Partizanit, që e konsiderojnë si projekt për të ardhmen. Bisedimet mes Hadrojt dhe Partizanit janë konkrete, por mbetet për t’u parë se kur mbrojtësi do të zyrtarizohet si afrimi i radhës në kampin e kuq.

MERKATO – Deri më tani Partizani ka afruar katër lojtarë zyrtarisht. Musta, Shehi, Marku dhe Rrapaj janë afrimet e të kuqve deri më tani, ndërsa dhe Paterni ka qenë pjesë e klubit në fazën përgatitore. Emrat që qarkullojnë për t’u afruar te Partizani janë disa, por ai i Shqiprim Taipit duket më konkreti. Gjithashtu, u përfol edhe për Eni Imamin, por kjo pistë duket larg.

VERONIK ISTREFAJ – PANORAMASPORT.AL

NDIQE LIVE "PANORAMA TV"

---