Tirana kreu dje seancën e fundit të stërvitjes në qytetin e Pogradecit ku kishin vendosur për të zhvilluar këtë minifazë përgatitore përpara udhëtimit për në Gjeorgji, pasi do të ndeshen për kualifikueset e Champions League me skuadrën e Dinamos së Tbilisit.

Dukej se pas miqësores së djeshme me Pogradecin lojtarët ndiheshin të lodhur, kështu që edhe trajneri kishte caktuar vetëm një seancë stërvitore për këtë ditë. Trajneri Egbo e kishte marrë tepër seriozisht ditën e fundit të minifazës, pasi ai u duk në stadium rreth 45 minuta para mbërritjes së ekipit.

Egbo madje u pa tek vendoste i vetëm piketat dhe disa objekte të tjera në stadium, objekte këto që mundësojnë kryerjen e disa ushtrimeve. Pak momente përpara fillimit të stërvitjes, Vangjeli, Batha dhe Hoxhallari dukeshin shumë të rehatuar dhe të qeshur në barin e fushës ku po shfrytëzonin freskinë dhe kohën e mbërritjes së lojtarëve të tjerë. Fillimisht zëvendëstrajneri Xhafa e ndau ekipin në dy grupe.

Pjesa e lojtarëve të formacionit dhe me eksperiencë qëndruan veçmas lojtarëve të rinj në moshë dhe atyre që janë afruar së fundi. Pjesa dërrmuese e fillimit të seancës kishte të bënte me ushtrime të cilat shërbenin për përgatitjen e anës muskulore. Trajneri i portierëve Osmani po stërviste të dy portierët e skuadrës. Mendohej se Egbo do të vinte rëndësinë te lojtarët kryesorë, por gjatë gjithë seancës ai u kujdes për përgatitjen e lojtarëve të rinj në moshë dhe afrimeve të fundit, duke i kushtuar pothuajse të gjithë kohën që kishte në dispozicion anës teknike dhe fizike.

Pas vetëm një ore stërvitje, Egbo mendoi të mbyllë seancën, kjo si pasojë edhe e lodhjes së lojtarëve, duke marrë parasysh se dje luajtën dhe një ndeshje miqësore. Manaxheri i klubit Mario Nikolli deklaroi për gazetën se do të bëhet nisja drejt kryeqytetit dhe dita e shtunë do të jetë pushim, pasi e gjithë skuadra do t’i nënshtrohet kryerjes së analizave mjekësore. Më pas do të bëhet edhe kryerja e analizës së tamponit kundër virusit, pasi kjo gjë kërkohet nga UEFA për çështje sigurie dhe në mënyrë që ekipi të udhëtojë i sigurt dhe pa probleme drejt Gjeorgjisë. Nisja për në Gjeorgji bëhet të martën.

REDI DANDALLAKU

NDIQE LIVE "PANORAMA TV"

---