Më në fund pas shumë muajsh negociata është arritur marrëveshja për duelin e madh të boksit ndërmjet Entoni Xhoshuas dhe Tajson Furit, teksa promotorët e dy kampionëve të peshave të rënda kanë firmosur akordin për një përballje të dyfishtë brenda vitit 2021.

Duele madhështore që do të unifikojnë titujt kampionë bote që zotërojnë dy britanikët. Rrjeti ESPN raporton se kontrata parashikon që në ndeshjen e parë të ardhurat të ndahen 50-50, ndërsa në duelin e dytë të revanshit ndarja të jetë 60-40 në favor të fituesit të sfidës së parë.

Ndërkohë ende nuk është zyrtarizuar data dhe vendi i ndeshjeve, të cilat mendohet të zhvillohen fillimisht në qershor apo korrik, ndërsa më pas revanshi në nëntor ose dhjetor të 2021-it. Edi Hërn, promotori i Entoni Xhoshuas do të shprehej kështu për sfidat:

“Ky është dueli më i madh i boksit dhe një prej eventeve më madhështore sportive në botë. Do të jetë një fitore e madhe dhe një reklamë e shkëlqyer për vendin ku do të zhvillohen sfida. Ne tashmë kemi pasur oferta të shumta të cilat kanë ardhur nga vende të ndryshme si Lindja e Mesme, Azia, Europa Lindore dhe Amerika”, është shprehur Hërn.

31-vjeçari, Xhoshua aktualisht zotëron katër titujt kampionë bote në federatat: “WBA, IBF, WBO dhe IBO”, ndërsa bilanci i tij në karrierë është 24 fitore (22 me KO) dhe vetëm 1 humbje, atë ndaj Andi Ruiz Xhuniorit. Në krahun tjetër Tajson Furi mban titullin kampion bote në federatën “WBC”. 32- vjeçari vijon të jetë i pamposhtur në ring, teksa numëron 30 fitore (21 me KO) dhe 1 barazim në 31 duele të zhvilluara gjatë karrierës.

ARTIN LLESHAJ – PANORAMASPORT.AL

NDIQE LIVE "PANORAMA TV"

---